Hokkeı: «Barys» máskeýlik «TsSKA»-men kezdesedi
ASTANA. 15 qarasha. QazAqparat - Búgin Astana qalasynyń «Barys» hokkeı klýby Máskeýde jergilikti «TsSKA» komandasymen kezdesedi.
Jalpy, osy ýaqytqa deıin eki komanda on ret kezdesken bolatyn. «TsSKA» jeti márte jeńse, «Barys» úsh-aq ret qarsylasynan basym tústi. Degenmen, bıylǵy chempıonatta astanalyq klýb «TsSKA»-ǵa qaraǵanda, oq boıy ozyq keledi. 26 matchtan keıin «Barystyń» enshisinde 53 upaı bar. Qurlyqtyq hokkeı lıgasynyń jalpytýrnırlik kestesinde komanda úshinshi orynǵa ornalasty. Al onyń búgingi qarsylastary - «TsSKA» hokkeı klýby barlyǵy 26 oıyn ótkizip, sonyń nátıjesi boıynsha tek 40 upaı ǵana jınap úlgergen. Qazirgi kezde máskeýlik top 10-shy orynda keledi.
Aıta keteıik, búgingi oıyn Astana ýaqyty boıynsha keshki saǵat 21:30-da bastalady. Ony «KAZsport» telearnasy tikeleı efır arqyly kórsetpek.
