Hokkeı: «Barys» Máskeýde «Spartaktan» overtaımda jeńilip qaldy
ASTANA. QazAqparat - Qurlyqtyq hokkeı lıgasynyń (QHL) kezekti kezdesýin Astananyń «Barysy» Máskeýde «Spartak» komandasymen ótkizip, overtaımda 3:4 esebimen utylyp qaldy, dep habarlaıdy «QazAqparat» tilshisi.
«Qazsport» telearnasynan tikeleı efırde kórsetkenindeı, aıdyn ıeleri birinshi kezeńde sátti oıyn órnegin kórsetip, aldymen 14-mınýtta Artem Podshendıalov gol soqty. Bes mınýttan keıin kanadalyq Ben Maksvell «Barystyń» qaqpashysy, shvetsııalyq Henrık Karlssondy qapy qaldyryp, esepti 2:0-ge jetkizdi.
Ekinshi kezeńde «Barys» quramyndaǵy taǵy bir kanadalyq Mettıý Frettın mergendigimen kózge tústi. Ol áýeli 25-mınýtta esepti 2:1-ge deıin qysqartty. Budan keıin 32-mınýtta «Spartaktan» Dmıtrıı Kalının úshinshi goldyń avtory atandy. Degenmen eki mınýttan soń M.Frettın shaıba oıynǵa qosylǵan kezde ony «Spartak» oıynshysynan tartyp alyp, Aleksandr Trýshkov qorǵaǵan qaqpaǵa jekedara shyǵyp, odan aılasyn asyra bildi.
Úshinshi kezeńde «Barys» barynsha shabýyldaýǵa tyrysyp baqty. «Spartak» ta qarap qalǵan joq. 48-mınýtta M.Frettın taǵy bir márte qaqpa buryshyn dál kózdep, ádemi gol soqty. Sóıtip ol bıylǵy birinshiliktegi alǵashqy het-trıgine qol jetkizip, tarazy basyn teńestirdi.
Osylaısha, negizgi ýaqyt taǵy da 3:3 esebimen teń aıaqtaldy. Olaı deıtinimiz, munyń aldynda Evgenıı Koreshkovtyń shákirtteri 21 qazan kúni Nıjnıı Novgorod qalasynda jergilikti «Torpedo» komandasymen kezdesip, qosymsha taımda gol soǵyp, 4:3 esebimen jeńiske jetken edi. Áıtse de bul joly «Barysqa» sáttilik joldas bolmaı, «Spartaktan» Vıacheslav Leşenko jeńis golyn soǵyp ketti. Máskeýlikter eki, elordalyqtar bir ǵana upaıǵa ǵana ıe boldy. «Barys» 43 upaımen QHL-dyń Shyǵys konferentsııasynda ázirge úshinshi orynda keledi.
Astanalyqtar kelesi matchyn 25 qazan kúni Fınlıandııa astanasy Helsınkı qalasynda Batys konferentsııasynda kósh bastap kele jatqan komandalardyń biri, jergilikti «Iokerıtpen» ótkizedi.
