HOKKEI: «Barys» Máskeýde «Dınamony» utty
ASTANA. QazAqparat - Qurlyqtyq hokkeı lıgasynyń (QHL) kezekti oıynynda Astananyń «Barysy» Máskeýde jergilikti «Dınamomen» kezdesip, 2:1 esebimen jeńiske jetti.
Birinshi kezeńniń sońǵy mınýtynda aldymen aıdyn ıeleri (Met Robınson) esep ashty. Ekinshi kezeńde esep ózgergen joq. Úshinshi, sheshýshi kezeńde «Barys» hokkeıshileri ábjildik tanyta bildi. Áýeli Talǵat Jaılaýovtyń pasynan keıin Vadım Krasnoslobodtsev tarazy basyn teńestirdi. Budan keıin máskeýlikter alǵa umtyldy. Tipti qorǵanysty umytty dese de bolady. Qarsy shabýyl kezinde 52-mınýtta Brendon Bochenskııdiń pasynan keıin Naıdjel Doýs qaqpany dál kózdedi. Matchtyń sońǵy mınýttarynda «Dınamo» qaqpashyny aıdyndaǵy oıynshyǵa almastyrǵanymen, «Barys» óz qaqpasyn goldan saqtaı bildi. Sóıtip Evgenıı Koreshkovtyń shákirtteri «Dınamony» óz aıdynynda tize búktirip, mańyzdy jeńiske qol jetkizdi.
Birinshilik barysynda 24 kezdesýden keıin 29 upaı jınaǵan astanalyqtar kelesi oıynyn 21 qazan kúni Bratıslavada «Slovan» komandasymen ótkizedi.
