Hokkeı: «Barys» Máskeýde «Dınamoǵa» ese jiberdi
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» Máskeýde «Dınamo» komandasymen ótkizip, 3:5 esebimen utylyp qaldy, dep habarlaıdy «QazAqparat» tilshisi.
Bul kezdesý qos komanda úshin de mańyzdy edi. Qorjynynda 65 upaıy bar máskeýlikter Batys, al odan eki upaıy kem «Barys» Shyǵys konferentsııasynda altynshy orynda turǵan-tuǵyn.
Oıyndy aıdyn ıeleri qarqyndy bastap, 1-mınýt óter-ótpeste Danııl Tarasov esep ashyp, «Dınamony» alǵa shyǵardy. Degenmen Evgenıı Koreshkovtyń shákirtteri qarap qalǵan joq. 14-mınýtta Vladımır Markelov tarazy basyn teńestirdi. Al ekinshi kezeńde Roman Starchenko 29-mınýtta shaıbany «Dınamo» qaqpasyna dál baǵyttaı bildi. Ókinishke qaraı, 36-mınýtta qarsy shabýyldan keıin Nıkıta Komarov soqqan shaıba kanadalyq qorǵaýshy Djordon Saýtornnyń aıaǵyna tıip, shvetsııalyq legıoner Henrık Karlsson qorǵaǵan qaqpaǵa kirip ketti. Eki mınýttan keıin qaqpaǵa jekedara shyqqan D.Tarasov buryshty dál kózdep, qos goldyń avtory atandy.
Úshinshi, sheshýshi kezeńde 43-mınýtta kanadalyq Lınden Veıdiń pasynan keıin onyń otandasy Djeıms Raıt esepti qaıta teńestirdi. Budan keıin astanalyqtar san basymdylyǵyn paıdalana almasa, máskeýlikter mundaı múmkindikti qalt jibergen joq. 50-mınýtta Dmıtrıı Vıshnevskıı esepti 4:3-ke jetkizdi. Іle-shala Kevın Dallman óte dóreki oınap, bes mınýtqa komandasyn qıyn jaǵdaıda qaldyrdy. Elordalyqtar qorǵanyp baqty, tipti Konstantın Pýshkarev shaıbaǵa óziniń denesin tosty. Biraq báribir qazir «Dınamonyń» sapynda oınap júrgen, buryn «Barystyń» namysyn qorǵaǵan Dastın Boıd 55-mınýtta kezdesý núktesin qoıdy.
Osylaısha, «Dınamodan» jeńilis tapqan elordalyqtar Máskeýden qur qol qaıtty.
Aıta keteıik, «Barys» aldaǵy bes birdeı oıynyn Astanada ótkizedi. Sonyń alǵashqysy 23 jeltoqsan kúni Shyǵys konferentsııasyndaǵy kósh bastaýshylardyń biri «Neftehımık» (Nıjnekamsk) komandasymen bolmaq.
