Hokkeı: «Barys» Máskeýde TsSKA komandasynan 6:5 esebimen basym tústi

ASTANA. QazAqparat – «Barys» Qurlyqtyq hokkeı lıgasyndaǵy kezekti oıynyn búgin Reseıde TsSKA (Máskeý) komandasyna qarsy ótkizdi, dep habarlaıdy QazAqparat tilshisi.

Eki komanda týrnır kestesinde árqalaı ornalasqan. Reseılik klýb aldyńǵy úshtikte kele jatsa, elordalyq komanda sońǵy oryndardy mise tutyp tur.

Pleı-off satysyna shyǵýdy aldyna maqsat tutqan «Barys» úshin árbir kezdesýdiń mańyzy zor. Sondyqtan olar atalǵan kezdesýde jeńiske jetý jolyn izdeıtin edi.

Kezdesý tartysty ótti. Eki komanda bir-biriniń qaqpasy mańynda jıi shabýyl uıymdastyrdy. Úshinshi kezeńnde komandalar 5:5 esebimen teń turdy.

Ony «Barys» sapynan Kırıll Savıtskıı 16, Egor Petýhov 29, Anton Sagadeev 40, 46, Nıkıta Mıhaılıs 50-mınýtta óziniń enshesine jazdy. Al reseılik klýbtan Vladıslav Kamenev 10, 50 , Nıkıta Nesterov 19, Nıkolaı Makarov 22, Maksım Mamın 39-mınýtta mergendik tanytty.

Negizgi kezeń 5:5 esebimen teń aıaqtalyp, oıyn overtaımǵa ulasty. Jeńis shaıbasyn Nıkıta Mıhaılıs soqty.

Osylaısha «Barys» qarsylasyn overtaımda 6:5 esebimen jeńdi.

Endi «Barys» aldaǵy oıynyn 13 aqpanda elordada Reseıdiń SKA (Sankt-Peterbýrg) komandasyna qarsy ótkizedi.

Eske salsaq, budan buryn «Barys» Reseıde máskeýlik «Dınamodan» jeńildi.