Hokkeı: «Barys» Máskeýde TsSKA-dan utyldy
ASTANA. QazAqparat - Astananyń «Barysy» Qurlyqtyq hokkeı lıgasyndaǵy (QHL) kezekti oıynyn Máskeýde TsSKA komandasymen ótkizip, 1:4 esebimen utylyp qaldy, dep habarlaıdy «QazAqparat».
Máskeýlikter tarıhy baı, QHL-daǵy kósh bastaýshy komandalardyń biri bolǵandyqtan, bul joly da upaı joǵaltpaý úshin baryn saldy. Bes mınýt óte bere Konstantın Okýlov esep ashsa, sálden keıin «Barys» sapyndaǵy qorǵaýshy Alekseı Maklıýkov tarazy basyn teńestirip úlgerdi. Áıtse de bir mınýttan keıin Maksım Shalýnov armııashylardy taǵy alǵa shyǵardy.
Ekinshi kezeńde astanalyqtar máskeýlikter aıdynnan qýylǵan kezde eki márte san basymdylyǵyn paıdalana almady. Esesine TsSKA mundaı múmkindikti múlt jibermeı, Valerıı Nıchýshkın 35-mınýtta esepti 3:1-ge jetkizdi.
Úshinshi kezeńde betine shaıba tıgen «Barystyń» kapıtany Naıdjel Doýs jaraqat alyp, oıyndy jalǵastyra almady. Bul da astanalyqtarǵa ońaı tıgen joq. Onyń ústine Anton Sagadeev oıyn tártibin buzyp, aıdynnan qýyldy. Dál osy kezde kútpegen jerden Pavel Akolzın aıdyn ıeleriniń qaqpashysy Ilıa Sorokınge betpe-bet kelgenimen, odan aılasyn asyra almady. ıAǵnı shabýylshynyń sheberligi jetispedi. Sportta ońtaıly sátte qaqpaǵa gol soqpasań, óz qaqpańa gol ótkizip alasyń degen támsil bar. Sonyń dálelindeı kóp uzamaı-aq TsSKA ádemi kombınatsııa uıymdastyryp, Sergeı Shýmakov taǵy bir goldy soǵyp ketti. Budan keıin de armııashylardyń qaqpany dál kózdeıtindeı múmkindikteri az bolǵan joq.
Osylaısha, «Barys» sońǵy on oıynnyń toǵyzynda jeńiliske ushyrap, kúni búgin Evgenıı Koreshkovtyń shákirtteri 60 upaımen Shyǵys konferentsııasynda segizinshi satyǵa syrǵydy. Pleı-off básekelerine ár konferentsııadan bastapqy segiz komandanyń shyǵa alatynyn eskersek, «Barysqa» endi shıramasa, joldamanyń aýyly alystap ketýi ábden yqtımal.
Aıta keteıik, «Barys» kelesi kezdesýin 18 jeltoqsan kúni Bratıslavada Batys konferentsııasynda sońǵy oryndardyń birinde kele jatqan jergilikti «Slovan» komandasymen ótkizedi.
