Hokkeı: «Barys» «Lokomotıvti» jerge qaratty

Bul oıynda tóreshilerdiń ádiletsizdik kórsetkenine qaramastan, «Barys» hokkeıshileri jeńisti qoldan bermeı, qarsylasyn qapy qaldyrdy. Oıynnyń alǵashqy shaıbasyn «Lokomotıv» salyp ketse de, «Barystyń» hokkeıshileri tarazy basyn teńestirip qana qoımaı, bir shaıbamen alǵa da shyqty. Bul joly Mıhaıl Rahmanov pen Naıdjel Doýs erekshe kózge tústi. Alaıda birinshi kezeńniń aıaqtalýyna sanaýly sekýndtar qalǵan kezde qarsylastar bir hokkeıshige artyq oınap, Arı Ahonendi qapy qaldyrdy. Esep teńesti - 2:2. Ekinshi kezeń qarsylastardyń sátti shabýylynan bastaldy. «Lokomotıv» alǵa shyqty. Osydan keıin «Barys» komandasynda tarazy basyn teńestirý úshin tamasha múmkindikter bar edi, tipti bir oıynshyǵa artyq oınaǵan kezimiz de boldy. Degenmen, ony da paıdalana almadyq. Osymen ekinshi kezeń de aıaqtaldy. Esep - 2:3. Úshinshi kezeńde «Barys» óz shabýyldaryn údetip, qarsylastar qaqpasyn torýyldaýmeen boldy. Osy kezde tóreshilerdiń ádiletsizdigi barynsha baıqaldy. Olar bolmashy jerde oıyndy toqtatyp, «Barystyń» qarqynyn tejeýge tyrysty. Alaıda oıynnyń aıaqtalýyna tórt mınýt qalǵan kezde, Konstantın Rýdenko «Lokomotıv» qaqpashysyn qapy qaldyryp, esepti teńestirdi. Al eki mınýt ótpeı, Naıdjel Doýs óz ornynan tabylyp, «Barysty» alǵa shyǵardy. Esep - 4:3. Sońǵy mınýttarda «Lokomotıvtiń» bapkeri qaqpashyny alyp tastap, altynshy oıynshyny shyǵardy. Sol kezde qarsylastar bizdiń qaqpamyzǵa biraz qysym jasady. Degenmen, «Barys» shaıbany óz alańynan shyǵara bildi. Al Maksım Spırıdonov ony bos turǵan qaqpaǵa baǵyttady. Qorytyndy esep - 5:3. Osylaısha, sońǵy tórt mınýttyń ishinde oıyndy óz paıdasyna sheshe bilgen «Barystyń» hokkeıshileri taǵy úsh upaıǵa ıe bolyp, jalpy týrnırlik kestede birden úshinshi orynǵa kóterildi. Kelesi oıynda «Barys» bıylǵy chempıonattyń favorıti - «SKA» (Sankt-Peterbor) komandasymen kezdesedi.