Hokkeı: «Barys» «Lokomotıv» komandasyn iri eseppen utty
ASTANA. QazAqparat - Qurlyqtyq hokkeı lıgasynyń (QHL) kezekti oıynynda Astananyń «Barysy» óz aıdynynda ıAroslavldyń «Lokomotıv» komandasyn qabyldap, 6:1 esebimen jeńiske jetti, dep habarlaıdy «QazAqparat» tilshisi.
«Lokomotıv» osyǵan deıin 26 upaımen QHL-dyń Batys konferentsııasynda kósh bastap kele jatqan komandalardyń biri-tuǵyn. Munyń aldynda «Barys-Arenadaǵy» bes matchynyń tórteýinde utylyp, kóp upaı joǵaltqan Evgenıı Koreshkovtyń shákirtterine de sheginer joq edi. Sondyqtan olar bul kezdesýde baryn saldy. Ásirese, qazaqstandyq oıynshy Nıkıta Mıhaılıs sátti óner kórsetti. Ol Marten Sen-Perdiń pasynan keıin 2-mınýtta esep ashty. Ekinshi kezeńde 25-mınýtta Mettıý Frettın esepti 2:0-ge jetkizdi. Degenmen qonaqtar (Denıs Alekseev) bes mınýttan keıin esepti qysqartty. Áıtse de Roman Savchenko esepti qaıta ulǵaıtty. Al úshinshi kezeńde «Barys» «Lokomotıvtiń» qaqpasyna jaýapsyz úsh gol soqty. Aldymen taǵy da Nıkıta Mıhaılıs, sosyn Lınden Veı men komanda kapıtany Naıdjel Doýs mergendik tanytty.
Osylaısha, elordalyqtar 25 upaımen Shyǵys konferentsııasynda besinshi orynǵa kóterildi. «Barys» kelesi alty oıynyn syrt aıdyndarda ótkizedi, bul ońaıǵa soqpasy anyq. Bul serııadaǵy alǵashqy «shaıqas» 30 qyrkúıek kúni Chelıabi qalasynda Shyǵys konferentsııasynda 17 upaımen onynshy satyda kele jatqan jergilikti «Traktor» komandasymen bolmaq.
