Hokkeı: «Barys» lıga chempıonyna birde-bir shaıba soǵa almady
ASTANA. QazAqparat - Búgin Qurlyqtyq xokkeı lıgasynyń shırek fınalynda astanalyq "Barys" xokkeı klýby syrt alańda "Metallýrg" komandasymen kezdesti, dep xabarlaıdy QazAqparat tilshisi.
Bul oıyn astanalyq klýb úshin sátti bastalǵan edi. "Barystyń" xokkeıshileri alǵashqy mınýttarda san basymdyǵyna ıe bolyp, birneshe qaýipti shabýyldy uıymdastyra bildi. Alaıda, eki metrlik boıy bar Koshechkınnen aılasyn asyra almady. Osydan keıin birde "Barys", birde "Metallýrg" erejeni buzyp, san basymdyǵy eki komandaǵa kezek-kezek aýysyp turdy. Al oıynnyń orta sheninde "Metallýrg" óz múmkindigin qalt jibermedi. Aleksandr Semınniń soqqan shaıbasyn qaqpashymyz Henrı Karlson sheber qaıtara bildi. Degenmen, keıin serpilgen shaıbany Oskar Osala beısbol bıtasymen urǵandaı qaqpaǵa toǵytty. Birinshi kezeńniń esebi - 1:0.
Ekinshi kezeńde "Barys" qansha tyrysqanmen tarazy basyn teńestire almady. Al úshinshi kezeńde "Metallýrg" bir emes, úsh birdeı shaıba soǵyp, óz basymdyǵyn ulǵaıtty. Qorytyndy esep - 4:0.
Aıta keteıik, osy oıynnan keıin "Metallýrg" jalpy esep boıynsha 1:0 esebimen alǵa shyǵyp otyr. Jartylaı fınaǵa shyǵý úshin qarsylasty tórt márte jeńý kerek. Magnıtogorsk qalasynyń xokkeı klýby ótken jylǵy chempıonattyń jeńimpazy atanǵan bolatyn.
