Hokkeı: «Barys» kútpegen jerden «Avtomobılıstiń» aldyn orap ketti
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» Ekaterınbýrgte «Avtomobılıst» komandasymen ótkizip, 4:2 esebimen jeńiske jetti, dep habarlaıdy «QazAqparat» tilshisi.
Astanalyqtar osynyń aldynda 20 kezdesýdiń 18-inde jeńilis taýyp, jankúıerlerin ábden jerge qaratqan edi. Al «Avtomobılıstiń» jóni bólek. Ekaterınbýrg komandasy Shyǵys konferentsııasynda 90 upaımen úshinshi orynda keledi, ıaǵnı Vladımır Krıkýnov shákirtteriniń pleı-off básekelerine joldama alatyny anyq. Soǵan qaramastan, bul match «Barystyń» áli de tuıaq serpe alatynyn kórsetti.
Birinshi kezeńde qonaqtardan ıAroslav Evdokımov esep ashsa, oıynnyń ekinshi bóliginde Nıkıta Mıhaılıs 2:0-ge jetkizdi. Aıdyn ıelerinen Alekseı Vasılevskıı esepti qysqartqanymen, Roman Starchenko mergendik tanytty.
Úshinshi kezeńde R.Starchenko taǵy bir goldyń avtory atansa, match sońynda «Avtomobılıst» komandasynan Aleksandr Torchenıýk san basymdylyǵyn paıdalana aldy.
Osylaısha, elordalyqtar 4:2 esebimen kópten kútken jeńisine qol jetkizdi.
Aıta keteıik, Ǵalym Mámbetálıevtiń shákirtteri 21 qańtar kúni óz aıdynynda Tolıattıdiń «Lada» komandasyn qabyldaıdy. 16 qańtar kúni astanalyqtar syrt aıdynda kósh sońynda kele jatqan osy klýbqa jol bergen bolatyn. Sodan keıin «Barys» 23 qańtar kúni taǵy bir kezdesýin óz aıdynynda «Avtomobılıst» komandasymen ótkizedi.
