Hokkeı: «Barys» komandasy «Torpedodan» oısyraı jeńildi
ASTANA. 10 qańtar. QazAqparat - Astanalyq "Barys" Qurlyqtyq lıgasynyń ashyq birinshiligi aıasynda ótkizgen kezekti matchta nıjegorodtyq "Torpedo" klýbynan utylyp qaldy.
Nıjnıı Novgorod qalasynda ótken kezdesý 7:2 esebimen muz aıdyny ıeleriniń jeńisimen aıaqtaldy. Torpedalyqtar atalmysh oıynnyń 7-mınýtynda birinshi bolyp esep ashty. Gol avtory - Denıs Parshın. Degenmen birinshi aınalymnyń sońyna deıin Talǵat Jaılaýov ketken eseni qaıtaryp, esepti teńestirdi. Ekinshi jıyrma mınýttyqta aıdyn ıeleri Vıtalıı Eremeevtiń qaqpasyna 4 gol salyp ketti. Oǵan "Barys" tek bir shaıbamen ǵana jaýap qaıtardy. "Torpedo" sapynan ıArkko Immone, Sakarı Salmınen, Vladımır Galýzın pen Voıtek Volskıı erekshelendi. Al astanalyqtardan Naıdjel Doýs gol avtory atandy. Úshinshi aınalymnyń basynda Vladımır Denısov qonaqtarǵa altynshy shaıbany saldy. Osydan keıin "Barys" klýbynyń bas bapkeri Arı-Pekka Selın komandanyń jas qaqpashysy Dmıtrıı Malgınge múmkindik berýdi sheship, ony Eremeevtiń ornyna shyǵardy. Alaıda klýb qataryna jańadan qosylǵan debıýtant torpedolyq hokkeıshi Mıhaıl Grıgorevtiń baǵyttaǵan shaıbasyn ustaı almady. Osylaısha "Barys" bıylǵy maýsymda alǵash ret óz qaqpasyna 7 shaıba engizip aldy. 14 qańtar kúni Astanada ótetin kelesi oıynda "Barys" oıynshylary máskeýlik "Spartakty" qabyldaıdy.
