Hokkeı: «Barys» komandasy «Avangardqa» ese qaıtara ala ma?
ASTANA. 30 qarasha. QazAqparat - Búgin astanalyq «Barys» komandasy Omby qalasynda jergilikti «Avangard» komandasymen kezdesedi.
Buǵan deıin Astanada oıyn ótkizgen osy eki komandanyń kezdesýi 3:5 esebimen aıaqtalǵan bolatyn. Ol kezde «Avangard» jeńiske jetti. Qazirdiń ózinde bul komandanyń qarqyny jaman emes. Týrnırlik kestede «Avangard» 4-shi orynda. Onyń enshisinde 59 upaı bar. «Barys» bolsa, 43 upaımen 13-shi orynda ornalasty. Búgingi oıyn «revansh» deýge bolady.
Negizi, «Barystyń» hokkeıshisi Vadım Krasnoslobodtsev jaraqatynan aıyǵyp, muz aıdynyna shyqqannan keıin «Jaılaýov - Gavrılın - Krasnoslobodtsev» úshtiginiń kúshi birden kórine bastady. Sońǵy ret «ıÝgra» komandasymen ótkizgen oıynda atalǵan úshtiktiń arqasynda qarsylastardyń qaqpasyna 4 (!) birdeı shaıba soǵyldy. Sol kezde «Barys» klýby «ıÝgrany» 6:2 esebimen tize búktirdi. Osy oıynda da «Barystyń» jigitteri alǵan betterinen qaıtpasa, astanalyq klýbtyń jeńiske jetýi ábden múmkin.
Aıta keteıik, búgingi oıyn keshki saǵat 18:00-de bastalady. Ony «Astana» telearnasynan tikeleı efır arqyly kórýge bolady.
