Hokkeı: «Barys» komandasy alǵashqy jeńisine qol jetkizdi

Qazaqstandyq «Barys» komandasy Qurlyqtyq hokkeı lıgasynda altynshy oıynynda Reseıdiń «Admıral» (Vladıvostok) komandasynan basym túsip, alǵashqy jeńisine qol jetkizdi, dep habarlaıdy QazAqparat tilshisi.

Aıta ketsek, elordalyq klýb Qurlyqtyq hokkeı lıgasyndaǵy budan burynǵy bes kezdesýinde qarsylastaryna ese jibergen edi.

Sondyqtan, búgingi kezdesýde jeńiske jetýge bar kúshin saldy. Oǵan reesılik klýb barynsha qarsylyq kórsetti.

Oıynnyń 5-mınýtynda «Barys» sapynan Djozef Labeıt esep ashsa, odan keıin «Admıral» qatarynan Maksım Chýdınov 16, Pavel Shen 24-mınýtta eki shaıba soǵyp ketti.

Al, 26-mınýtta Djeremı Brakko tarazy basyn teńestirse, Djovannı Fore 40-mınýtta qaıtadan «Admıral» komandasyn alǵa shyǵardy.

Oıynnyń 42, 53-mınýttarynda «Barys» kapıtany Roman Starchenok qos shaıba soǵyp, óz komandasyna jeńis alyp keldi.

Osylaısha elordalyq klýb qarsylasynan 4:3 esebimen basym tústi.

Endi «Barys» aldaǵy oıynyn 18 qyrkúıekte elordada Reseıdiń «Neftehımık» (Nıjnekamsk) komandasyna qarsy ótkizedi.