HOKKEI: «Barys» QHL matchynda Mınskiniń «Dınamosyn» jeńdi (FOTO)
ASTANA. QazAqparat - Qurlyqtyq hokkeı lıgasynyń turaqty chempıonatynda Astananyń «Barysy» óz aıdynynda Mınskiniń «Dınamosyn» qabyldap, 4:2 esebimen jeńiske jetti.
Eki komanda da pleı-off básekesine joldama alý úshin baryn salyp júrgendikten, kezdesý tartysty boldy. Sodan shyǵar, birinshi kezeńde esep ashylǵan joq. Ekinshi kezeń bastalysymen Kevın Dallmen shabýylǵa sátti qosylyp, mergendik tanytty. Kóp uzamaı segiz mınýttan keıin Maksım Hýdıakov esepti 2:0-ge jetkizdi. Úsh mınýttan soń «Dınamo» oıynshysy Pol Şehýra esepti qysqartqanymen, on sekýnd óter-ótpeste Dastın Boıd qonaqtar qaqpasyn dál kózdedi. Úshinshi kezeń 1:1 esebimen teń aıaqtaldy. Aldymen astanalyq Brendon Bochenskı kózge tússe, «Dınamodan» Raıan Veske esepti 4:2-ge deıin qysqartty. Meımandar qansha tyrysqanymen, osy esep oıyn sońyna deıin ózgergen joq.
Sóıtip «Barys» taǵy bir mańyzdy jeńisine qol jetkizip, 52 oıynnan keıin 78 upaı jınap, Shyǵys konferentsııasynda burynǵysha jetinshi orynda keledi. Astanalyqtar kelesi kezdesýin 21 qańtar kúni óz aıdynynda Shyǵys konferentsııasynda 97 upaımen kósh bastap kele jatqan Ombynyń «Avangard» komandasymen ótkizedi. Bul oıynnyń «Barysqa» óte qıynǵa túsetini anyq.
Aıta keteıik, búgin, 20 qańtar kúni Shyǵys konferentsııasynda «Baryspen» pleı-off básekelerine shyǵý úshin talasyp júrgen «Avtomobılıst» (Ekaterınbýrg) pen «Neftehımık» (Nıjnekamsk) ózara kezdesedi. Shyǵys konferentsııasynda «Avtomobılıst» pen «Neftehımık» 51 oıynnan keıin sáıkesinshe 74 jáne 72 upaı jınap, segizinshi, toǵyzynshy satyda tur. Sondyqtan Ekaterınbýrgte ótetin bul oıynnyń qos komanda úshin de mańyzy zor.
