Hokkeı: «Barys» hokkeı klýby «Metallýrgty» jeńdi
ASTANA. 17 qazan. QazAqparat - Búgin Astana qalasynyń «Barys» hokkeı klýby syrt alańda «Metallýrg» komandasyn jeńdi.
Novokýznetsk qalasynyń komandasy bıylǵy chempıonattyń aýtsaıderi bolsa da, osy jolǵy matchta «Barystyń» mazasyn aldy. Astanalyq komanda esepti birinshi bolyp ashty. Alaıda qarsylastar esepti teńestirip, ekinshi kezeńde bir shaıbamen alǵa shyqty. «Barys» bir mınýttyń ishinde tarazy basyn teńestirdi. Esep - 2:2. Úshinshi kezeńde «Metallýrg» taǵy da alǵa shyqty. Degenmen, Brendon Bochenskı dýblmen kózge túsip, qaıtadan esepti teńestire bildi. Al oıynnyń aıaqtalýyna eki mınýttaı qalǵanda, Naıdjel Doýstyń shaıbasy «Barysty» alǵa shyǵardy. Osy kezde «Metallýrgtyń» bapkeri qaqpashyny alyp tastap, altynshy oıynshyny shyǵarady. Negizgi maqsat - esepti teńestirý. Biraq «Barystyń» hokkeıshileri shaıbany alyp qoıyp, bos turǵan qaqpaǵa besinshi shaıbany salyp ketti. Qorytyndy esep - 5:3. Osy machtan keıin «Barys» taǵy úsh upaıǵa (jalpy 37 upaı) qol jetkizip, Shyǵys konferentsııada qaıtadan birinshi orynǵa shyqty. Al jalpy týrnırlik kestede komanda «Aq Barsty» (35 upaı) artqa tastap, úshinshi orynǵa kóterildi.
