Hokkeı: «Barys» hokkeı klýby «Dınamodan» taǵy da utyldy
ASTANA. 23 qarasha. QazAqparat - Astana qalasynyń «Barys» hokkeı klýby óz alańynda «Dınamo» (Latvııa, Rıga) komandasyna jol berip qoıdy.
Bul oıynda «Barystyń» hokkeıshileri naǵyz alǵyrlyq tanytty. Astana qalasynyń hokkeı klýby 1:3 esebimen utylyp jatyp, tarazy basyn teńestire bildi. Birinshi kezeńde qarsylastar esepti birinshi bolyp ashty. Al ekinshi kezeńde taǵy bir shaıba soǵyp ketti. Jarty mınýttyń ishinde «Barys» bir shaıba salyp, esep aıyrmasyn qysqartty. Alaıda «Dınamo» qaıtadan óz basymdyǵyn ulǵaıtty. Esep - 1:3. Soǵan qaramastan, jaýapty úshinshi kezeńge deıin «Barystyń» hokkeıshileri esepti teńestirdi. Aldymen Roman Starchenko ekinshi shaıbany salsa, Dastın Boıd dýbl jasap, esepti 3:3-ke deıin jetkizdi. Úshinshi kezeńde Naıdjel Doýs tórtinshi shaıbany soǵyp, «Barysty» alǵa shyǵardy. Biraq matchtyń aıaqtalýyna tórt mınýttaı qalǵanda, tóreshiler Evgenıı Blohınge eki mınýttyq aıyp taǵyp, muz aıdynynan alastatty. «Dınamo» osy múmkindikti qalt jibermedi. Pol Shehýra tarazy basyn teńestirip, býllıt serııasynda óz komandasyna jeńis ákeldi.
Aıta keteıik, buǵan deıin syrt alańda ótken oıynda da «Barys» bul komandaǵa býllıt serııasynda 2:3 esebimen utylǵan bolatyn.
