Hokkeı: «Barys» elordada «Traktor» komandasynan basym tústi

NUR-SULTAN. QazAqparat - Elordalyq «Barys» Qurlyqtyq hokkeı lıgasyndaǵy kezekti oıynyn elordada «Traktor» (Chelıabınsk) klýbyna qarsy ótkizdi, dep habarlaıdy QazAqparat tilshisi.

Eki komanda buǵan deıin 47 márte kezdesti. Onyń 25-i «Barystyń» basymdyǵymen aıaqtalsa, qalǵanynda reseılik klýbtyń mereıi ústem boldy.

Qazir týrnır kestesinde tórt oıynnan bir upaıǵa qol jetkizgen «Barys» 20-orynda keledi. Al bes oıynnan keıin 4 upaı alǵan «Traktor» 17-orynǵa jaıǵasqan.

Sondyqtan búgingi kezdesýde eki komanda jeńiske jetýge bar kúshin saldy.

Oıynnyń 6-mınýtynda elordalyq komandadan Lıden Veı esep ashsa, Kırıll Savıtskıı 15-mınýtta «Barystyń» basymdyǵyn arttyrdy.

Oǵan 19-mınýtta «Traktor» hokkeıshisi Teemý Pýlkkınen bir golmen jaýap qaıyrdy.

Kezdesýdiń sońǵy mınýtynda reseılik klýb qaqpashysyz oınady. Nátıjesinde Lınden Veı sanaýly sekýnd qalǵanda bos qaqpaǵa gol soqty.

Osylaısha «Barys» qarsylasyn 3:1 esebimen tize búktirip, alǵashqy jeńisine qol jetkizdi.

Endi elordalyq klýb 15 jáne 16 qyrkúıekte Reseıdiń «Avangard» komandasymen eki oıyn ótkizedi.

Eske salsaq, budan buryn elordalyq klýb tórt oıynda qarsylastaryna ese jiberip qoıdy.