Hokkeı: «Barys» ekinshi kezdesýinde «Admıraldan» jeńilip qaldy

ASTANA. QazAqparat – «Barys» Qurlyqtyq hokkeı lıgasyndaǵy kezekti oıynyn búgin Reseıde «Admıral» (Vladıvostok) komandasyna qarsy ótkizdi, dep habarlaıdy QazAqparat tilshisi.

8 qańtarda eki komanda arasynda ótken alǵashqy kezdesýde «Barys» 5:1 esebimen basym túsken edi.

Reseılik komanda sol ketken eseni qaıtarýǵa tyrysty. Al elordalyq klýb jeńisti joldy jalǵastyrýǵa tyrysty.

Oıynnyń 5-mınýtynda «Admıral» hokkeıshisi Pavel Shen esep ashty. Budan keıin eki komandanyń gol soǵatyn birneshe múmkindigi bolǵan edi. Degenmen tablodaǵy esepke ózgeris engen joq.

Ekinshi kezeńde eki komanda gol soǵýǵa umtyldy. Alaıda hokkeıshiler dáldk kórsete almaı jatty. Oıynnyń 36-mınýtynda reseılik komandadan Lıbor Shýlak esepti ústemeleı tússe, 38-mınýtta Dmıtrıı Sıdlıarov basymdyqty arttyrdy.

Osylaısha «Barys» qarsylasyna 0:3 esebimen ese jiberdi.

Endi «Barys» aldaǵy oıynyn 12 qańtarda elordada Reseıdiń TsSKA (Máskeý) komandasyna qarsy ótkizedi.

Foto: sports.kz