Hokkeı: «Barys» ekinshi aınalymda súrindi
ASTANA. QazAqparat - Búgin Qurlyqtyq xokkeı lıgasynyń shırek fınaldyq oıyndary aıasynda "Barys" xokkeı klýby óz alańynda "Metallýrg" komandasyn qabyldady, dep xabarlaıdy QazAqparat tilshisi.
Osy joly astanalyq klýbtyń xokkeıshileri birinshi bolyp esepti ashty. Alǵashqy kezeńniń orta tusynda Brendon Bochenskıdiń pasynan keıin Naıdjel Doýs qorǵaýshylardy aldap ótip, sol qaptaldan óziniń "súıikti" shaıbasyn soqty. Esep - 1:0. Ekinshi kezeńde shaıba soǵylmasa da, esep aıyrmasyn ulǵaıtýǵa tamasha múmkindikter boldy. Al úshinshi kezeńde "Metallýrg" eki mınýttyń ishinde eki birdeı shaıba soǵyp ketti. "Barys" eki shaıbany da bir oıynshyǵa kem quramda jiberip aldy. Degenmen, astanalyq xokkeıshiler esepti teńestire bildi. Maksım Hýdıakovtyń shaıbany domalatyp bergen pasynan keıin Korı Trıvıno týra qaqpashynyń qalqanyna tıgizdi. Osy kezde shaıba Koshechkınnen asyp ketip, qaqpanyń syzyǵyna túsetin edi. Alaıda Nıkıta Mıxaılıs ony muzǵa jetkizbeı, beısbol bıtasymen urǵandaı shaıbany qarsylastyń qaqpasyna toǵytty. Esep - 2:2. Oıynnyń negizgi ýaqyty osymen aıaqtaldy.
Overtaımda "Barysta" jeńis shaıbasyn soǵatyn birneshe múmkindik boldy. Naıdjel Doýstyń soqqysynan keıin shaıba qaqpanyń mańdaıshasyna da tıgen. Alaıda Maksım Semenov erejeni buzyp, aıyp ýaqytyn óteýge attanǵanda qarysalastar bir shaıbany soǵyp ketti. Osylaısha, "Metallýrg" komandasy 2:3 esebimen utty. Al jalpy esep boıynsha tórt ret qatarynan jeńiske jetip, jartylaı fınalǵa joldama aldy.
Aıta keteıik, pleı-offtyń alǵashqy aınalymynda "Barys" Chelıabi qalasynyń "Traktor" komandasyn jeńgen. Alaıda ekinshi aınalym - shırek fınalda lıga chempıony - "Metallýrg" komandasynan jeńilip otyr.
