Hokkeı: «Barys» «Cıbır» komandasynan jeńilip qaldy
NUR-SULTAN. QazAqparat - Qurlyqtyq hokkeı lıgasy aıasynda «Barys» búgin, 28 jeltoqsanda elordada Reseıdiń «Cıbır» (Novosibir) komandasymen kezdesti, dep habarlaıdy QazAqparat tilshisi.
Eki komanda týrnır kestesinde qatarlas tur. Olardyń pleı-off kezeńine shyǵýyna múmkindigi bar. Búgin jeńiske jetken jaǵdaıda «Barys» jaǵdaıyn odan ári jaqsartsa, «Cıbır» pleı-offqa shyǵatyn 16 komandanyń qataryna qosylýǵa múmkindik alatyn.
Kezdesý barysynda elordalyq hokkeıshiler oıyndy jaqsy bastady. Alǵashqy bolyp esep ashty. Oıynnyń 3-mınýtynda Mett Frettın mergendik tanytty.
Ekinshi kezeńde reseılik komanda tarazy basyn teńestirip ketti. Ony 31-mınýtta Efrım Gýrkın óziniń enshisine jazdy.
Úshinshi kezeń bastala salysymen «Cıbır» esepti ulǵaıta tústi. Bul joly 40-1-mınýtta Dmıtrıı Saıýstov qaqpadan múlt ketken joq. Oıynnyń bitýine 15 sekýnd qalǵanda reseılik klýb sapynan Mıkael Rýohomaa jeńis shıbasyn soǵyp ketti.
Osylaısha «Barys» qarsylasynan 1:3 esebimen jeńilip qaldy. Qazaqstandyq klýb bıyl «Cıbır» klýbyna ekinshi márte ese jiberip otyr.
Budan buryn 26 qazanda Novosibirde ótken oıynda olarǵa 1:3 esebimen jeńildi.
Endi elordalyq klýb 30 jeltoqsanda elordada Reseıdiń «Avtomobılıst» (Ekaterınbýrg) komandasyn qabyldaıdy.
Esterińizge sala ketelik, budan buryn «Barys» on oıynnyń toǵyzynda jeńiske jetken bolatyn.
