Hokkeı: «Barys» búgin syrt alańda «Lev» komandasymen kezdesedi

«Levtyń» Qurlyqtyq hokkeı lıgasyna qosylǵanyna kóp bola qoıǵan joq. Sol sebepti osy ýaqytqa deıin eki komanda eki-aq ret kezdesken. Ekeýinde de «Barys» jeńiske jetti. Birinshi oıyn 4:2 esebimen aıaqtalsa, ekinshi matchta Astana qalasynyń hokkeı klýby óz qarsylasynan 5:1 esebimen basym túsken. Lıganyń jalpytýrnırlik kestesinde «Barys» (56 upaı) úshinshi orynda tursa, «Lev» (42 upaı) on birinshi orynda keledi.

Aıta keteıik, keshe «Barys» hokkeı klýbynyń resmı saıtynda búgingi oıyn túngi saǵat 00:00-de bastalady dep berildi. Sodan keıbir túsinispeýshilikter de oryn aldy. Oıynnyń ýaqyty naqtylandy. «Barys» pen «Lev» arasyndaǵy match túngi saǵat 23:55-te bastalady. Ony «KAZsport» telearnasy tikeleı efır arqyly kórsetedi.