Hokkeı: «Barys» búgin sheshýshi oıynyn ótkizedi
ASTANA. 5 naýryz. QazAqparat - Búgin Reseıdiń Chelıabi qalasynda astanalyq «Barys» hokkeı klýby men jergilikti «Traktor» komandasy arasyndaǵy sheshýshi oıyn ótedi.
Qurlyqtyq hokkeı lıgasynyń pleı-off oıyndary aıasynda bul komandalar osymen jetinshi ret kezdeskeli otyr. Alǵashqy eki oıynda «Barys» jeńiske jetip, eki upaı oljalasa, «Traktor» qatarynan úsh kezdesýde óz qarsylasyn utty. Sońǵy altynshy oıynǵa deıin tarazy basy 2:3 boldy. Alaıda «Barys» bar múmkindigin jumsap, jalpy esepti 3:3-ke jetkize bildi. Endi, kelesi aınalymǵa ótý úshin eki komandaǵa da bir-aq jeńis kerek. Sondyqtan da búgingi oıyn asa tartysty ári qyzyqty ótpek.
Esterińizge sala keteıik, Qurlyqtyq hokkeı lıgasynyń pleı-off oıyndary aıasynda ótetin «Barys» pen «Traktor» arasyndaǵy sońǵy kezdesý keshki saǵat 19:00-de bastalady. Ony «Astana» telearnasynan tikeleı efır arqyly kórýge bolady.
