Hokkeı: «Barys» búgin óz aıdynynda «Severstaldi» qabyldaıdy
ASTANA. 5 jeltoqsan. QazAqparat - Búgin astanalyq «Barys» hokkeı klýby óz aıdynynda «Severstal» (Cherepovets) komandasyn qabyldaıdy.
Aıta ketken jón, buǵan deıingi oıynda «Barystyń» jigitteri «Severstalge» jol berip, 2:3 esebimen (býllıt) utylǵan bolatyn. Negizi, A.Nazarovtyń shákirtteri bıyl shataq minez tanytyp, tym qatty oınap júr. Ony «Baryspen» ótkizgen sońǵy oıynnan anyq baıqaýǵa bolady. Biraq qazaqstandyq hokkeıshiler de des beretin emes. Olar da qarsylastaryna qyr kórsetip, tóbeles izdegenderge tıisti jaýap bere bildi. Degenmen, syrt alańda ótken kezdesý bolǵannan keıin «Barys» negizgi ýaqytta oıyndy óz paıdasyna sheshe almady. Al býllıtte bizdiń baǵymyz janbaı júr. Sondyqtan búgingi oıynda «Barys» býllıtke jetpeı, jeńiske qol artady degen senim bar.
Jalpy, Qurlyqtyq hokkeı lıgasynyń týrnırlik kestesinde «Severstal» komandasy 48 upaımen 11-shi orynda jaıǵassa, «Barys» sońǵy eki oıynnan keıin qaıtadan 15-shi orynǵa túsip qaldy. Astanalyq hokkeı klýbynyń enshisinde 44 upaı bar.
Esterińizde bolsa, búgingi oıyn keshki saǵat 19:00-de bastalady. Ony «Astana» telarnasynan tikeleı efır arqyly kórýge bolady.
