Hokkeı: «Barys» búgin «Atlantty» qabyldaıdy
ASTANA. 14 qyrkúıek. QazAqparat - Búgin «Barys» óz alańynda «Atlant» (Máskeý oblysy) komandasyn qabyldaıdy. Bul - Qurlyqtyq hokkeı lıgasynyń jańa maýsymy aıasyndaǵy astanalyq hokkeı klýbynyń tórtinshi oıyny.
Buǵan deıin «Barys» úsh oıynnyń ekeýinde jeńiske jetse, sońǵy matchta chempıonattyń favorıti - «SKA» komandasyna jol berip qoıdy. Qazir astanalyq klýbtyń enshisinde 16 shaıba jáne 6 upaı bar. Ol jalpy týrnırlik kestede 10-shy orynda tur. Al «Barystyń» búgingi qarsylasy - «Atlant» ázirshe aýtsaıderlerdiń qatarynda. Bul komanda tórt oıynda da jeńilip, bir-aq upaıdy oljalaǵan. Chempıonatqa qatysyp jatqan 28 komandanyń tiziminde ol eń sońǵy orynda ornalasty.
Aıta keteıik, búgingi oıyn Astana ýaqyty boıynsha keshki saǵat 17:30-da bastalady. Ony «Kazsport» telearnasynan tikeleı efır arqyly kórýge bolady.
