Hokkeı: «Barys» «Avtomobılıstpen» joldastyq kezdesý ótkizbeıtin boldy
NUR-SULTAN. QazAqparat - Elordalyq «Barys» Reseıdiń «Avtomobılıst» komandasymen joldastyq kezdesý ótkizbeıtin boldy, dep habarlaıdy QazAqparat tilshisi klýbtyń baspasóz qyzmetine silteme jasap.
Budan buryn «Barys» 31 tamyzda atalǵan reseılik klýbpen muz aıdynyna shyǵady dep josparlanǵan edi. Kezdesý Ekaterınbýrg qalasynda ótýi tıis bolatyn.
Endigi kezekte «Barys» aldaǵy maýsymǵa daıyndyq barysynda 27 jáne 29 tamyzda Qaraǵandynyń «Saryarqa» komandasymen eki oıynda sheberlik baıqasady.
Odan keıin qurlyqtyq hokkeı lıgasyndaǵy alǵashqy oıynyn 3 qyrkúıekte Latvııada «Dınamo» (Rıga) komandasyna qarsy ótkizedi.
Esterińizge sala ketelik, «Barys» budan buryn Óskemenniń «Torpedo» klýbymen eki márte joldastyq kezdesý ótkizdi. Alǵashqysynda 1:2 esebimen jeńilip, ekinshi oıynda 6:4 esebimen basym tústi.
