Hokkeı: «Barys» «Avangardtan» utylyp qaldy
ASTANA. QazAqparat - Qurlyqtyq hokkeı lıgasynyń (QHL) kezekti oıynynda Astananyń «Barysy» óz aıdynynda Ombynyń «Avangard» komandasyn qabyldap, býllıt serııasynda utylyp qaldy, dep habarlaıdy «QazAqparat» tilshisi.
Shyǵys konferentsııasynda «Barys» birinshi, «Avangard» tórtinshi orynda kele jatqandyqtan, bul matchtyń asa tartysty óteri belgili edi. On myńnan astam kórermen tamashalaǵan kezdesýdiń birinshi jáne ekinshi kezeńinde gol soǵatyndaı qos komandanyń da kóptegen múmkindikteri bolǵanymen, esep ashylǵan joq. Oǵan qosa qaqpashylar Henrık Karlsson («Barys») men ombylyq Oleg Shılın de jaqsy turdy.
Kezdesýdiń úshinshi bóligi aıdyn ıeleriniń san basymdylyǵymen bastalǵanymen, «Barys» bul qolaıly sátti de paıdalana almady. Match bitýge toǵyz mınýttaı ýaqyt qalǵanda, aıdyn ıelerinen Aleksandr Lıpın tártip buzyp, aıyp oryndyǵyna otyrdy. Osyny qalt jibermegen «Avangardtyń» qorǵaýshysy Maksım Chýdınov esep ashty. Degenmen namysqa tyrysyp, qarqyndy kúsheıtken «Barys» hokkeıshileri oıyn bitýge tórt mınýttaı ýaqyt qalǵanda, tarazy basyn teńestirdi. Talǵat Jaılaýov pen Maksım Semenovtiń pasyn qur jibermegen qorǵaýshy Roman Starchenko osy birinshiliktegi tórtinshi golyn soqty. Budan keıin shabýyl sátinde qarsylastyń qaqpasy aldynda jalǵyz qalǵan Talǵat Jaılaýov shaıbany dál baǵyttaı almady.
Osylaısha, kezdesýdiń negizgi ýaqyty 1:1 esebimen teń aıaqtaldy. Overtaımda «Barystyń» bas bapkeri Evgenıı Koreshkov qaqpashyny aıdyndaǵy oıynshyǵa aýystyryp kórdi. Osyndaı sátte «Avangard» jeńis golyn soǵyp kete jazdady. Degenmen overtaım da jeńimpazdy anyqtaı almaı, kezdesý býllıt serııasyna ulasty. Munda qonaqtar mergendik tanytyp, 2 upaıǵa ıe boldy. 10 qazan kúni Ombyda «Barys» «Avangardty» 4:3 esebimen tize búktirgen edi. Osy joly ombylyqtar qarymta qaıyrdy. Sóıtip bul básekeden keıin 58 upaı jınaǵan Evgenıı Koreshkovtyń shákirtteri QHL-dyń Shyǵys konferentsııasynda burynǵysha birinshi orynda keledi. Áıtse de 56 upaımen ekinshi orynda turǵan «Aq Barys» (Qazan) komandasynyń «Barystan» úsh oıyny kem, sondyqtan onyń basyp ozýy ábden yqtımal.
Aıta keteıik, «Barys» aldaǵy bes birdeı kezdesýin syrt aıdynda ótkizedi. Sonyń ishinde 20 jáne 22 qarasha kúnderi Novosibirde «Sıbır» komandasymen eki márte oınaıdy. 15 jáne 17 qyrkúıek kúnderi astanalyqtar óz aıdynynda dál osy klýbqa oılamaǵan jerden 1:3 jáne 0:4 esebimen ese jibergen bolatyn. Sondyqtan bul básekelerdiń ońaıǵa soqpasy anyq.
