Hokkeı: «Barys Arenaǵa» jankúıerler qaıta kiretin boldy
NUR-SULTAN. QazAqparat – Elordadaǵy «Barys Arena» stadıonyna jankúıerler qaıta kiretin boldy, dep habarlaıdy QazAqparat tilshisi.
Bul týraly QR Mádenıet jáne sport mınıstrligi Sport isteri jáne dene shynyqtyrý komıtetiniń tóraǵasy Serik Sápıev Instagram -daǵy paraqshasynda málim etti.
«Barlyǵy da hokkeıge! Hokkeı jankúıerleri úshin jaqsy jańalyq. Sanıtarlyq-epıdemıologııalyq talaptardy saqtaı otyryp, Qurlyqtyq hokkeı lıgasy aıasynda pleı-off
matchtaryn tolymdylyǵy 30 paıyzdan aspaıtyndaı jankúıerlerdiń qatysýymen ótkizýge ruqsat berildi. Erteń, 6 naýryz kúni saǵat 17.00-de «Barys» «Metallýrgpen» kúsh synasady», dep jazdy S.Sápıev.
Eske sala keteıik, budan buryn «Barystyń» overtaımda «Metallýrgtan» basym túskenin jazǵan bolatynbyz.
Oıyndar serııasynda eki matchtan keıin esep teń – 1:1.
