Hokkeı: «Barys» «Amýrdan» jeńilip qaldy
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» Habarovkide «Amýr» komandasymen ótkizip, 1:3 esebimen utylyp qaldy, dep habarlaıdy «QazAqparat» tilshisi.
Bul kezdesý pleı-off básekesinen úmitti qos komanda úshin de mańyzdy bolatyn. Shyǵys konferentsııasynda «Amýr» 69 upaımen toǵyzynshy orynda tursa, onynshy satydaǵy «Barystyń» odan alty upaıy kem-di. Sondyqtan matchtyń tartysty ótýi zańdy edi.
Birinshi kezeń aıdyn ıeleriniń basymdylyǵymen ótkenimen, esep ashylmady. Bul aralyqta 5-mınýtqa taman Roman Savchenko men «Amýrdan» Vıacheslav Ýshenın shekisip qalyp, bes mınýtqa qýylǵannan basqa aıtarlyqtaı «qyzyq» bola qoıǵan joq.
«Barystyń» qaqpashysy Sergeı Kýdrıaevtsev oıynnyń ekinshi bóliginde birneshe qaýipti soqqyny qaıtara bildi. Áıtse de «Ańdyǵan jaý almaı qoımaıdy», degendeı, Lınden Veı aıdynnan qýylǵannan keıin 31-mınýtta ıAn Kolarj aqyry esep ashty.
Úshinshi kezeńde «Amýrdan» Bogdan Potehın tártip buzyp, aıdynnan qýylǵan sátte ony «Barystyń» qorǵaýshysy Kevın Dallman paıdalana bilip, 42-mınýtta tarazy basyn teńestirdi. Alaıda ile-shala ushqyr shabýyldan keıin qaqpa aldynda jalǵyz qalǵan Aleksandr Gorshkov mergendik tanytty. «Barys» beıneqaıtalaýǵa júginip kórgenmen, odan eshteńe shyqpady.
Oǵan qosa qaqpashy men qorǵaýshynyń qateliginen keıin Georgıı Berdıýkov esepti 3:1-ge jetkizdi. Osylaısha, aıdyn ıeleri eki mınýtqa jetpeıtin ýaqyt ishinde qos goldy soǵyp úlgerdi. Budan keıin «Barystyń» kapıtany Naıdjel Doýstyń júıkesi syr berip, Ivan Belıakovpen judyryqtasyp qaldy. Sosyn dórekilik kórsetken Darren Dıts aıdynnan qýylǵan kezde «Amýrdyń» qateliginen keıin Konstantın Pýshkarev óz múmkindigin múlt jiberdi.
Sóıtip munyń aldynda 17 oıynnyń 15-inde jeńilis tapqan astanalyqtar taǵy da utylyp qaldy. Bul jańa jyldyń alǵashqy kúni qyzmetinen ketken burynǵy bas bapker Evgenıı Koreshkovtyń ýaqytsha ornyn basqan Ǵalym Mámbetálıevtiń ekinshi kezdesýi edi.
Aıta keteıik, elordalyqtar kelesi oıynyn 11 qańtar kúni Vladıvostokta Shyǵys konferentsııasynda 12-orynda kele jatqan «Admıral» komandasymen ótkizedi.
