Hokkeı: «Barys» 3:0 esebimen jeńip turyp, «Avangardtan» utylyp qaldy
ASTANA.QazAqparat - «Barys» QHL-daǵy bıylǵy sońǵy kezdesýin Ombyda jergilikti «Avangardpen» ótkizdi, dep habarlaıdy QazAqparat tilshisi.
Osyǵan deıin 45 oıynnan 59 upaı jınaǵan ombylyqtar Shyǵys konferentsııasynda ekinshi orynda tursa, 41 matchtan 58 upaı jınaǵan «Barys» besinshi satyda edi. Sondyqtan quıryq tistesip kele jatqan komandalar úshin bul báseke asa mańyzdy edi.
Birinshi kezeńniń sońyna taman elordalyqtar sheberlikterin tanytyp, sátti oınaı bildi. 17-mınýtta Pavel Akolzın men Dastın Boıdtyń pasynan keıin Dmıtrıı Shevchenko esep ashty. 19-mınýtta Anton Sagadeev pen P.Akolzınniń kómegimen D.Shevchenko esepti 2:0-ge jetkizdi.
«Avangardtyń» bas bapkeri, kanadalyq Bob Hartlı ekinshi kezeńde qaqpaǵa Igor Bobkovtyń ornyna Ivan Nalımovty qoıýǵa májbúr boldy. Áıtse de I.Nalımov ta óz qaqpasyn aman saqtap qala almady. San basymdylyǵyna ıe bolǵan kezde 28-mınýtta Patrıs Kormeniń pasynan keıin Darren Dıtstiń soqqysynan soń keri serpilgen shaıbaǵa birinshi jetken Andre Peterssonǵa qaqpanyń ashyq tusyn kózdeý qıyn bolǵan joq. Budan keıin aıdyn ıeleri jıi-jıi san basymdylyǵyna ıe bolyp, shabýyldy údetkenimen, qaqpashy Henrık Karlsson bastaǵan qorǵanys shebi syr bere qoımady.
Bul taıtalas úshinshi kezeńde de jalǵasty. Qarsy shabýylǵa shyqqan mezette P.Korme tamasha múmkindikti paıdalana almady. Kezdesý barysynda H.Karlsson qyryqtan astam seıv jasap, komandasyn goldan qutqaryp jatty. Onyń qaqpasyna eki márte shaıba kirgenimen, beıneqaıtalaýdy qarap kórgen tóreshiler gol boldy dep eseptegen joq. Degenmen H.Karlsson 51-mınýtta «Avangardtyń» shabýylshysy Kırıll Petrovtyń soqqan shaıbasyn qaıtarǵanymen, Alekseı Emelınge esh amal isteı almady - 3:1.
Kezdesý aıaqtalýǵa úsh jarym mınýt ýaqyt qalǵanda, Kertıs Volk tártip buzyp, aıdynnan qýylǵannan keıin ombylyqtar qaqpashysyn altynshy oıynshyǵa aýystyrdy. Bul taktıka óz jemisin berip, K.Petrov esepti qysqartty. Sodan soń Evgenıı Medvedev tarazy basyn teńestirip úlgerdi - 3:3.
Overtaımda qarsylastar birin-biri ala almaǵannan keıin báseke býllıt serııasyna ulasty. Munda «Avangard» komandasy jeńiske jetti.
Osylaısha qolda turǵan jeńisten aıyrylyp qalǵan astanalyqtar týrnır kestesinde ombylyqtardy qýyp jete almady.
Jańa jylda «Barystyń» syrt aıdyndaǵy serııasy jalǵasady. 3 qańtarda Máskeýde «Spartakpen» kúsh synassa, eki kúnnen keıin Sochıde jergilikti komandamen sheberlik baıqasady. Sodan soń Astanaǵa oralyp, óz aıdynynda qatarynan bes match ótkizedi.
Eske sala keteıik, budan buryn «Barystyń» Chelıabi qalasynda «Traktordy» 3:0 esebimen oısyrata jeńgenin jazǵan bolatynbyz.
