Hokkeı: Barystyń sátsizdigine ne sebep
ASTANA. KAZINFORM – Elordalyq «Barys» hokkeı komandasy ekinshi jyl qatarynan Qurlyqtyq hokkeı lıgasy pleı-off satysynan syrt qaldy.
Bul sátsizdik jankúıerler tarapynan túrlishe baǵalanyp jatyr. Osyǵan baılanysty mamandar, jýrnalıster, jankúıerler ne deıdi? Kazinform tilshisi osy jóninde oı-talqyǵa salyp kórdi.
Bir maýsymda úsh bapker
Elordalyq komanda jylma-jyl hokkeı básekesiniń pleı-off satysyna shyǵyp, joǵary nátıjesimen jankúıerlerdi qýantyp júrgen edi. Dese de keıingi eki jylda komanda súreńsiz oıynymen kópshilikti mezi etip júr. Sońǵy oıynda birde-bir márte jeńiske jetken joq. Osylaısha pleı-off satysyna shyǵýdan shet qaldy.
Elordalyq komanda 2023/2024 jylǵy maýsymdy óte sátsiz bastady. Alǵashqy alty oıynda jeńilistiń aşy dámin tatty. Komandanyń bas bapkeri qyzmetin atqarǵan belarýstik maman Andreı Skabelka osyndaı sátsizdikter serııasynan keıin ornyn bosatty. Onyń ornyna kelgen qazaqstandyq Ǵalym Mámbetálıev aıdynǵa negizinen jergilikti jastardy shyǵaryp, olardyń tájirıbesin arttyrýǵa nazar aýdardy. Sebebi, ol ulttyq quramaǵa da jetekshilik etedi. Ótken jyly qazaqstandyq hokkeıshiler álem chempıonatynyń elıtalyq dıvızıonynda ornyn saqtap, álem jankúıerleri tarapynan joǵary baǵalanǵan edi. Sondyqtan ol úshin Qurlyqtyq hokkeı lıgasynda jastarǵa kóbirek múmkindik berip, tájirıbesin arttyrý mańyzy erekshe bolǵany anyq.
Komanda atalǵan hokkeı básekesine 2008 jyldan beri turaqty túrde qatysyp keledi. On bes jyldan beri «Barys» úsh márte ǵana pleı-off satysyna shyǵa alǵan joq. Al tórt márte Shyǵys konferentsııasynda jartylaı fınalǵa deıin jetti. Qazaqstandyq jankúıerler jylma-jyl komandanyń joǵary bıikten kóringenin qalaıdy. Dese de sońǵy jyldardaǵy sátsizdik jankúıerler kóńilinen shyqpaı júrgeni jasyryn emes.
Belgili sport jýrnalısi Nurǵazy Sasaev hokkeı taqyrybynda jıi oı qozǵap keledi.
Onyń aıtýynsha, árbir komandanyń tek legıonerlerge ıek artyp otyrýy durys emes.
«Negizinde árbir komandanyń alǵa qoıǵan jospary bolýy tıis. Qurlyqtyq hokkeı lıgasynda tájirıbeli komandalarǵa qarsy turýy úshin úzdik legıonerlerdi komanda quramyna tartqan artyq emes. Osy maqsatta alǵashqy bestiktegi hokkeıshiler sheteldikter boldy. Nátıjesinde táp-táýir nátıjege qol jetkize aldyq. Sebebi, bul bestigimiz QHL-da úzdikter qatarynda edi. Olarǵa kóbi qarsy tura alǵan joq. Qazir she? Legıonerlerge ondaı talap joq sekildi. Keıbiri tipti talapqa da saı emes ekenin ańǵardyq. Byltyr jáne bıylǵy jyldyń basynda 21 oıynshynyń basym bóligi sheteldik oıynshylar boldy. Saldarynan qazaqstandyq hokkeıshilerge eshqandaı múmkindik berilgen joq. Endigi kezekte jergilikti oıynshylarǵa jol ashyp otyrǵanymyz durys. Qurlyqtyq hokkeı lıgasynan buryn ulttyq quramanyń deńgeıin joǵarylatýǵa mán bergenimiz jón», - dedi ol.
Jeńilisten kóz ashpady
Ótken jyldyń 13 jeltoqsanynan bastap «Barysqa» bas bapker qyzmetine Oleg Bolıakın keldi. Qazaqstandyq maman sheteldik jáne otandyq jankúıerlerge jaqsy tanys. Sodan beri elordalyq klýb 21 kezdesý ótkizip úlgerdi. Onyń nebári 5-de jeńiske jetse, qalǵanynda qarsylasqa ese jiberdi. Tipti, sońǵy 10 kezdesýde jeńilisten kóz asha almaı keledi.
Rasynda, bıyl elordalyq komandaǵa úsh maman bapkerlik jasady. Kináni kimnen izdeımiz? Árıne, Andreı Skabelka komandany jańa maýsymǵa jasaqtaýǵa kúsh saldy. Dese de ol bul másele barysynda kóptegen qatelikke boı aldyrdy. Ol senim bildirgen sheteldik hokkeıshiler seniminen shyǵa alǵan joq. Komandany jeńiske jeteleý barysynda kóshbasshy sanala almady. Uzaq jyldan beri qazaqstandyq hokkeıge jankúıerlik jasap júrgen Erkin Ábil jergilikti jastarǵa kóbirek úmit artý qajettigin aıtady.
«Negizinde álemde burynǵy jyldarda qazaqstandyq hokkeıshiler joǵary baǵalanatyn edi. Kezinde NHL-da oınaǵan Evgenıı Nabokov, Nıkolaı Antropov, Vıtalıı Eremeev, Vıtalıı Kolesnık, Konstantın Pýshkarev syndy sańlaqtarymyz boldy. Qazir eshqandaı hokkeıshimiz atalǵan lıgada oınap júrgen joq. Meniń oıymsha, aldaǵy ýaqytta óz úzdikterimizdi daıyndap shyǵarýǵa múmkindik berýimiz qajet. Sodan keıin olardyń álemniń úzdik lıgalarynda baq synaýyna jol ashylady. Ókinishtisi, qazir bul jóninen maqtana almaımyz. Alda atqarylatyn aýqymdy ister bar dep oılaımyn», — deıdi ol.
Komanda tizginin kim ustaıdy?
Elordalyq komanda endi Qurlyqtyq hokkeı lıgasynda jeti oıyn ótkizedi. Onyń tórteýinde syrtta oınasa, úsheýinde qarsylastaryn elordada qabyldaıdy. Bul kezdesýde qansha upaı jınaı alamyz? Ázirge belgisiz. Óıtkeni, qazir komanda upaıdy qarsylastaryna ońdy-soldy taratyp júr. Búginde týrnır kestesinde eń sońǵy 23 oryndy mise tutyp turǵan jaıy bar. «Barys» mundaı tómen nátıjege buryn-sońdy túsip kórgen emes.
Máselen, 2015/2016 jyly 85 upaımen 17-oryndy mise tutsa, 2017/2018 jyldarda 56 oıynnan 74 upaımen 19-orynǵa jaıǵasty. Al ótken jyly 60 oıynnan 85 upaımen 17-orynǵa turaqtady.
Bul jyldardyń ózinde komanda qazirgideı eń tómengi nátıje kórsetken emes. Sondyqtan bıyl «Barys» úshin óte sátsiz ótken deýge negiz bar.
Aldaǵy maýsymda kim bas bapker qyzmetin atqarady? Komanda basshylyǵy ózgere me? Bul jóninde ázirge boljam aıtý qıyndaý. Dese de bilikti bapkerdi qyzmetke shaqyryp, komandany burynǵy deńgeıine kóterýdiń mańyzy artyp turǵan jaıy bar.
