Hokkeı: «Barys» úshinshi jeńisine qol jetkizdi

ASTANA. KAZINFORM - Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn elordada Reseıdiń «Avangard» (Omby) komandasyna qarsy ótkizdi. 

Elordalyq klýb jańa maýsymda on tórt oıynnyń on ekisinde jeńilistiń aşy dámin tatty.

Sondaı-aq, keıingi bes kezdesýdiń birde-birinde jeńiske jete almaı keledi. Osynyń saldarynan týrnır kestesinde sońǵy oryndy mise tutyp tur.

Aıta keterligi, eki komanda arasyndaǵy sońǵy úsh kezdesýde elordalyq klýb qarsylasyna ese jiberip qoıǵan edi.

Alǵashqy mınýttan alǵa qaraı umtylǵan «Barys» reseılik klýb qaqpasynan 14-mınýtta sańylaý tapty. Áriptesteri Natan Bole men Anton Býrdasovtyń bergen pasyn Danııl Apalkov golǵa aınaldyra bildi.

Ekinshi jáne úshinshi kezeńde qarsylastar bir-biriniń qaqpasynan sańylaý taba alǵan joq.

Osylaısha «Barys» 1:0 esebimen basym túsip, qatarynan bes jeńilisten keıin alǵash ret qarsylasyn qapy qaldyrdy.

Aıta ketsek, eki komanda buǵan deıin 78 márte kezdesken. Onyń 26-y elordalyq klýbtyń basymdyǵymen aıaqtalsa, qalǵan oıynda reseılik komanda jeńiske jetken.

Endi qazaqstandyq komanda budan keıingi taǵy bir oıynyn elordada ótkizip, 16 qazanda «Salavat ıÝlaev» (Ýfa) klýbymen sheberlik baıqasady.