HOKKEI: «Aısulý» Qazaqstan chempıony atandy
ASTANA. QazAqparat - Áıelder arasyndaǵy shaıbaly hokkeıden Qazaqstan chempıonatynyń fınalynda «Aısulý» komandasy astanalyq «Tomırısti» 2:0 esebimen jeńdi, dep habarlaıdy QazAqparat tilshisi Aqparattyq sport habyna silteme jasap.
«Osylaısha, astanalyqtar kúmis júldege qol jetkizse, óskemendik «Torpedo» qolany qanaǵat tutty. Chempıonattyń úshinshi kezeńinde barlyq kezdesýlerin jeńispen aıaqtaǵan «Aısulý» fınalda da óz qarsylastaryna shaıba soǵýǵa múmkindik bermedi. Aleksandr Maltsev shákirtteri absolıýtti jeńimpaz ekeninderin dáleldedi. Sheshýshi oıynda Madına Tursynova men Zarına Týhtıeva mergendigimen kózge túsip, komandaǵa jeńis syılady», - delingen resmı habarlamada.
Chempıonattyń nátıjesi boıynsha «Aısulý» komandasynyń qaqpashysy Arına Şekolova «úzdik qaqpashy» atansa, Malıka Aldabergenova «úzdik shabýylshy» mártebesine ıe boldy. Al «Tomırıstiń» hokkeıshisi Darıa Nıteıskaıa «úzdik qorǵaýshy» retinde tanyldy.
«Búgingi oıyn qıyn ótti. Astanadan kelgen qarsylastarymyz sońyna deıin berilmeı oınady. Sheshýshi kezdesýde tek eki shaıba soǵa aldyq. Alaıda, biz odan da kóp soǵamyz dep oılaǵanbyz. Tóreshiler meni osy maýsymnyń eń úzdik qaqpashysy retinde tańdaǵany úshin alǵysym sheksiz. Árıne, bul qýantarlyq jaıt», - deıdi úzdik qaqpashy Arına Şekolova.
Saltanatty marapattaý rásiminde jeńimpazdar men júldegerlerge medaldar jáne kýboktar tabystaldy. 
