Hokkeı: Aýa raıy saldarynan «Ertis» pen «Torpedo» kezdese almaıtyn boldy
NUR-SULTAN. QazAqparat - Shaıbaly hokkeıden pavlodarlyq «Ertis» jáne óskemendik «Torpedo» komandalary arasyndaǵy kezdesý keıinge shegerildi, dep habarlaıdy QazAqparat tilshisi.
Ol jóninde pavlodarlyq klýbtyń baspasóz qyzmeti málim etti.
Bul sheshim Pavlodar qalasyndaǵy aýa raıynyń qolaısyzdyǵyna baılanysty qabyldanyp otyr. Aýa raıyna baılanysty eskertý Óskemende de habarlanǵan.
Soǵan baılanysty jolaýshylar tasymalyn júzege asyratyn kez kelgen kólik quralynyń óńirden tys jerlerge shyǵýyna tyıym salynǵan. Osyǵan baılanysty «Ertis» pen «Torpedo» komandalarynyń Óskemende 5-6 qańtarda ótkizilýi josparlanǵan oıyndary keıinge shegerildi.
Bul sheshim eki oblystyń polıtsııa departamentteri, elimizdiń hokkeı federatsııasy jáne klýbtardyń kelisimi negizinde qabyldandy. Atalǵan oıynnyń ótetin kúni jaqyn arada qosymsha habarlanatyn bolady.
