Hokkeı: Astananyń «Barysy» overtaımda «Severstal» komandasyn utty (FOTO)
ASTANA. QazAqparat - Qurlyqtyq hokkeı lıgasynyń kezekti oıynynda Astananyń «Barysy» óz aıdynynda týrnır kestesindegi kósh sońyndaǵy komandalardyń biri Cherepovetstiń «Severstalyn» qabyldap, overtaımda 4:3 esebimen jeńiske jetti.
Matchtyń 4-mınýtynda qonaqtar qaqpasy mańynda ábjildik tanytyp, shaıbany ıelengen Maksım Hýdıakov Maksım Semenovke dál pas berdi. M.Semenovtiń alystan soqqan shaıbasyn «Severstaldyń» qaqpashysy kórmeı qaldy ma, áıteýir ótkizip aldy. Sodan keıin 15-mınýtta aıdyn ıeleri qonaqtardyń eki birdeı oıynshysynyń aıyp ýaqytyn óteýin tıimdi paıdalanyp, Brendon Bochenskı esepti 2:0-ge jetkizdi. Ekinshi kezeńde Vadım Krasnoslobodtsevtiń ádemi pasynan keıin Konstantın Pýshkarev 34-mınýtta mergendik tanytty. Al bes mınýttaı ýaqyt ótkennen keıin «Barystyń» bir oıynshysy 2 mınýt aıyp ýaqytyn ótep bolmaı jatyp, qonaqtardan Dmıtrıı Kagarlıtskıı kózge tústi.
Sheshýshi, úshinshi kezeńde «Barysqa» qaraǵanda, jıi shabýyldap, áldeqaıda shıraq oınaǵan «Severstal» bir oıynshysynyń artyqtyǵyn paıdalanyp, (Danııl Vovchenko) 48-mınýtta esepti 3:2-ge deıin qysqartty. Sodan keıin Vadım Krasnoslobodtsev tártipsizdik jasap, aıdynnan qýylǵan sátte «Barystyń» qaqpashysy ıAn Latso jaraqat alyp, ornyna Pavel Polýektov shyqty. Osy qarbalas sátte «Severstal» taǵy ábjildik tanytyp, Anatolıı Nıkontsev tarazy basyn teńestirip ketti. Sóıtip match barysynda astanalyqtar 3:0 esebimen alǵa shyqqanymen, basymdylyqtaryn saqtaı almaı, negizgi ýaqyt 3:3 esebimen teń aıaqtaldy.
Overtaım bastalysymen-aq Brendon Bochenskı mergendik kórsetip, komandasyna jeńis syılady.
Qazirgi kezde 61 upaımen Shyǵys konferentsııasynda burynǵysynsha toǵyzynshy orynda kele jatqan «Barysqa» árbir upaı aýadaı qajet. Óıtkeni pleı-off básekelerine qatysý úshin alǵashqy segizdikke qalaıda iligý kerek.
Astanalyqtar bıylǵy jyldaǵy sońǵy oıynyn 29 jeltoqsanda týrnır kestesinde kósh bastap kele jatqan Máskeýdiń TsSKA komandasymen ótkizedi.
