HOKKEI: Astananyń «Barysy» Máskeýdiń «Dınamosyn» tize búktirdi (FOTO)
ASTANA. QazAqparat - Qurlyqtyq hokkeı lıgasynyń kezekti matchynda Astananyń «Barysy» óz aıdynynda Máskeýdiń «Dınamosyn» qabyldady.
«Qazsport» telearnasynan tikeleı efırde kórsetkenindeı, alǵashqy eki kezeńde esep ashylǵan joq. Sheshýshi, úshinshi kezeńde astanalyq komanda «Dınamo» oıynshylarynyń tártip buzyp, aıdynnan qýylǵanyn tıimdi paıdalanyp, Maık Landın esep ashty. Biraq kezdesý bitýge 3 mınýt 30 sekýnd qalǵanda, ıÝýso Hıetanen «Barys» qaqpasyn dál kózdep, tarazy basyn teńestirip ketti. Budan keıin overtaım eshqandaı nátıje bergen joq.
Býllıt soǵýda «Barys» jeńiske jetip, eki upaıǵa ıe boldy. Bul - astanalyqtardyń bıylǵy maýsymdaǵy býllıt serııasyndaǵy alǵashqy jeńisi. Osy oıynnan keıin 51 upaı jınaǵan «Barys» Shyǵys konferentsııasynda toǵyzynshy orynda keledi. Segizinshi satydaǵy Nıjnekamskiniń «Neftehımık» komandasynan astanalyqtardyń tórt upaıy kem. Bul - olardyń úzdik segizdikke iligýine múmkindik bar degen sóz.
