HOKKEI: Astananyń «Barysy» Helsınkıde «Iokerıt» komandasyna ese jiberdi
ASTANA. QazAqparat - Qurlyqtyq hokkeı lıgasynyń chempıonatyndaǵy kezekti týrynda Astananyń «Barysy» Helsınkı qalasyndaǵy «Hartvall Arenada» «Iokerıt» komandasymen kúsh synasty.
Osyǵan deıin 56 upaı jınaǵan fın komandasy jalpy chempıonat kestesinde besinshi, Batys konferentsııasynda ekinshi orynda kele jatsa, odan baqandaı on upaıy kem astanalyqtar sáıkesinshe 18-inshi, Shyǵys konferentsııasynda 10-ynshy satyda ornalasqan edi.
«Barys» qaqpasyn bul joly Pavel Polýektov qorǵasa, biraz úzilisten keıin shabýylshy Talǵat Jaılaýov ta aıdynǵa shyqty.
QHL telearnasynan kórsetkenindeı, qos komanda qanshama tyrysqanymen, alǵashqy eki kezeńde esep ashylǵan joq.
Úshinshi kezeńde «Barys» óz múmkindikterin paıdalana almasa, 49-mınýtta aıdyn ıeleri esep ashty. Oıyn sońynda qaqpashysyn alyp tastaǵan astanalyqtar taǵy bir goldy ótkizip aldy. Budan keıin fınder taǵy bir gol soqqanymen, ony tóreshiler eseptegen joq. Sóıtip «Iokerıt» 2:0 esebimen jeńiske jetti.
Eske sala keteıik, osynyń aldynda alty ret qatarynan jeńiske jetken «Barys» ótken týrda Sankt-Peterborda SKA komandasynan da 1:5 esebimen utylyp qalǵan bolatyn.
«Barys» kelesi oıynyn 27 qarasha kúni óz aıdynynda Ýfanyń «Salavat ıÝlaev» komandasymen ótkizedi.
