Hokkeı: Astananyń «Barysy» býllıt serııasynda «ıÝgra» komandasyn utty (FOTO)
ASTANA. QazAqparat - Qurlyqtyq hokkeı lıgasynyń turaqty chempıonatynda oınaıtyn Astananyń «Barysy» bıylǵy jyldyń alǵashqy kezdesýin «Barys-Arenada» Shyǵys konferentsııasynda onynshy orynda kele jatqan «ıÝgra» (Hanty-Mansıısk) komandasymen ótkizip, býllıtten keıin 3:2 esebimen jeńiske jetti.
Bul joly da «Barys» quramynda kóp ózgeris bola qoıǵan joq. Qaqpany Pavel Polýektov qorǵasa, Naıdjel Doýstyń ornyna Roman Starchenko shyqty.
QHL telearnasynan tikeleı efırde kórsetkenindeı, birinshi bolyp úshinshi mınýtta bir oıynshysynyń artyqtyǵyn paıdalanyp, qonaqtar (Denıs Gorbýnov) esep ashty. Eki mınýttan keıin astanalyq komanda quramyndaǵy amerıkandyq Maık Landın esepti teńestirdi. Budan soń «Barys» eki márte «ıÝgra» oıynshysynyń aıdynnan qýylǵan sátin paıdalana almady.
Ekinshi kezeńde «ıÝgra» (Evgenıı Orlov) qaıtadan alǵa shyqty. Budan keıin de qonaqtar basymdylyq tanytyp, gol soǵatyn sátterin jiberip aldy.
Alma-kezek shabýylmen ótken úshinshi kezeńde kanadalyq Dastın Boıd qaqpa buryshyn dál kózdep, esepti qaıta teńestirdi. Budan keıin astanalyqtar besinshi márte bir oıynshynyń basymdylyǵyna ıe bolǵanymen, ol múmkindikti de paıdalana almady. Sóıtip negizgi ýaqyt 2:2 esebimen teń aıaqtaldy. Overtaım da nátıje bermedi.
Býllıt serııasynda Pavel Polýektov tamasha oınap, eki márte qonaqtar soqqan shaıbany qaıtara bilse, Roman Starchenko qaqpany dál kózdedi.
«Barys» kelesi oıynyn Astanada 5 qańtar kúni óziniń negizgi qarsylastarynyń biri Ekaterınbýrgtiń «Avtomobılıst» komandasymen ótkizedi.
Aıta keteıik, «Barys» Shyǵys konferentsııasynda 66 upaımen burynǵysha jetinshi orynda keledi.
