HOKKEI: Astananyń «Barysy» altynshy ret qatarynan jeńiske jetti
ASTANA. QazAqparat - Qurlyqtyq hokkeı lıgasynyń (QHL) chempıonatynda Astananyń «Barysy» Máskeýde «Spartak» komandasyn 5:2 esebimen tize búktirdi.
Vesti.kz saıtynan alynǵan málimetke qaraǵanda, bul - Andreı Nazarov shákirtteriniń qatarynan altynshy jeńisi. «Sokolnıkı» sport saraıynda ótken kezdesýdiń 9-mınýtynda «Barystan» Kevın Dallmen esep ashsa, 21 sekýndtan keıin Vadım Krasnoslobodtsev «Spartaktyń» qaqpasyn dál kózdedi. Matchtyń ekinshi kezeńinde 33-mınýtta Konstantın Romanov esepti 3:0-ge jetkizse, kóp uzamaı aıdyn ıelerinen Aleksandr Mereskın kózge tústi. Úshinshi kezeńde «Barystan» 50-mınýtta Maksım Hýdıakov mergendik tanytsa, «Spartaktan» Gleb Klımenko esepti qaıta qysqartty. Degenmen 57-mınýtta astanalyqtar Marten Sen-Perdiń sheberligimen oıyn núktesin qoıyp, esepti 5:2-ge jetkizdi. Qazirgi kezde «Barystyń» qorjynyndaǵy upaı sany 46-ǵa jetti. Astanalyq hokkeıshiler kelesi kezdesýin 19 qarasha kúni Sankt-Peterborda jergilikti SKA komandasymen ótkizedi.
