Hokkeı: astanalyq «Barys» «Sibirge» ekinshi ret ese jiberdi
ASTANA. QazAqparat - Qurlyqtyq hokkeı lıgasynyń (QHL) kezekti týrynda Astananyń «Barysy» jeksenbi kúni óz aıdynynda «Sibir» (Novosibir) komandasymen ekinshi oıynyn ótkizdi, dep habarlaıdy «QazAqparat» tilshisi.
Bul joly aıdyn ıeleriniń qaqpasyn Sergeı Kýdrıavtsev qorǵady. Bastapqyda «Barys» hokkeıshileriniń gol soǵatyndaı múmkindikteri bolǵanymen, ony paıdalana almady. Esesine 8-mınýtta qonaqtardan Nıkolaı Demıdov óz komandasyn alǵa shyǵardy. Al 14-mınýtta «Sibir» komandasy san basymdylyǵyn paıdalanyp, Ivan Vereşagın esepti 2:0-ge jetkizdi. Oıynnyń ekinshi kezeńinde Vladıslav Naýmov úshinshi goldy soqty. Match aıaqtalýǵa taman Vıacheslav Osnovın bos qalǵan qaqpany dál kózdedi.
Osylaısha, «Sibir» 4:0 esebimen jeńiske jetti. Munyń aldynda 15 qyrkúıek kúni novosibirlikter «Barysty» 3:1 esebimen tize búktirgen bolatyn. Bul oıynnan keıin 19 upaı jınaǵan «Sibir» komandasy týrnır kestesinde «Barysty» qýyp jetti.
Qatarynan eki jeńilisten keıin QHL-dyń Shyǵys konferentsııasynda besinshi orynǵa syrǵyǵan astanalyqtar kelesi kezdesýin elordada 21 qyrkúıek kúni «Dınamo» (Mınsk) komandasymen ótkizedi.
