Hokkeı: astanalyq «Barys» ońbaı jeńildi
ASTANA. QazAqparat - Astanalyq «Barys» hokkeı klýby Qurlyqtyq hokkeı lıgasy aıasynda Mytışılik «Atlanta» komandasymen oıyn ótkizip, qarsylasynan óz qaqpasyna 5 gol ótkizip aldy.
Arena-Mytışı stadıonynda ótken kezdesý 1:5 esebimen aıaqtaldy.
Birinshi aınalymda «Atlanta» hokkeıshileri astanalyqtarǵa jaýapsyz 3 gol salyp ketti. Sergeı Shmelev dýbl avtory atansa, kelesi bir goldy Igor Radýlov salyp ketti. Ekinshi jıyrma mınýttyqta «Barys» Naıdjel Doýstyń mergendigimen bir gol ese qaıtardy. Degenmen qazaqstandyq klýb árige bara almady. Kerisinshe úshinshi aınalymda muz ıeleri «Barys» qaqpasyna taǵy eki shaıba engizdi. Aldymen 44-mınýtta Evgenıı Artıýhın kózge tússe, keıin Radýlov oıynda dýbl avtory atandy.
Degenmen, bul jeńilisine qaramastan, «Barys» QHL-dyń Shyǵys konferentsııasynda ekinshi orynda keledi. «Atlanta» Batys konferentsııasynda toǵyzynshy orynǵa kóterildi.
