Hokkeı: «Astana-1997» Qazaqstan chempıonatynda kósh bastaýda
ASTANA. 22 qańtar. QazAqparat - Elordada 10 qańtarda bastalǵan 1997 jyly týǵandar arasyndaǵy hokkeıden Qazaqstan chempıonatynyń ekinshi týry aıaqtaldy.
Chempıonatqa «Astana», Qostanaı qalasyndaǵy № 3 BJSM, Óskemen qalasynyń «Torpedo» jáne «Ýstınka», Pavlodardyń «Ertis», Qaraǵandynyń «ıÝnost», Pavlodardyń BJSM, Rýdnyıdyń «Gornıak» sııaqty 8 komandasy qatysty, dep habarlady Astana qalasynyń resmı saıty týrızm, dene shynyqtyrý jáne sport basqarmasyna silteme jasap.
«Astana» komandasy jeti oıyn ótkizip, 21 upaı jınady. Olar árbir oıynda jeńiske jetip, kósh basynan kórindi. Elordalyq hokkeıshilerdiń eń iri jeńisi - 12:0 esebimen «Gornıakty» oısyrata utýy boldy. Ásirese, astanalyqtardyń óskemendik «Torpedo» komandasyn jeńýi týrnır kestesindegi sheshýshi mańyzǵa ıe boldy.
«Torpedolyqtar» 18 upaımen ekinshi oryndy ıelendi. Eki týrdyń qorytyndysy boıynsha úshinshi oryn 12 upaı jınaǵan qostanaılyq №3 BJSM komandasyna buıyrdy.
«Astana-1997» komandasynyń jattyqtyrýshysy Aleksandr Zavodov bul maýsymda chempıondyq ataqty jeńip alýdan úmitti, bul týraly ol ekinshi týr aıaqtalǵan soń málimdedi. «Astanadaǵy týr joǵary deńgeıde ótti. Alaıda, bizdiń negizgi qarsylasymyz - óskemendik «Torpedo» komandasy.
Bul jolǵy kezdesý óte tartysty ótti, alaıda bizdiń baǵymyz jandy. Úshinshi týrda da jeńiske jetip, el chempıony atanamyz degen úmitimiz basym. Bizdiń komandanyń buǵan tolyq kúshi jetetindigine senimdimin», -dedi ol.
Ótken maýsymda A. Zavodovtyń komandasy Qazaqstan chempıonatynyń kúmis júldesin qanjyǵaǵa baılaǵan bolatyn.
