Hokkeı: «Arlan» Belarýstiń «Gomel» komandasyn oısyrata jeńdi
KÓKShETAÝ. QazAqparat - Kókshetaýdyń «Arlan» HK Irlandııada ótip jatqan hokkeıden Qurlyqaralyq kýboktyń fınalyndaǵy ekinshi kezdesýinde jeńiske jetti, dep habarlaıdy QazAqparat tilshisi.
Bul joly "Arlan" Belarýstiń "Gomel" komandasyn 8:2 (4:0, 3:1, 1:1) esebimen oısyrata jeńdi. Arlandyqtar tarapynan Dmıtrıı Potaıchýk kezdesýdiń eń úzdik oıynshysy atandy. Erteń "Arlan" hokkeıshileri alań ıeleri «Belfast Djaıants» komandasymen sheshýshi oıyn ótkizedi. Bul kezdesýde jeńiske jetken komanda Qurlyqaralyq kýboktyń ıegeri atanady.
Eske sala keteıik, osyǵan deıin habarlaǵanymyzdaı, "Arlan" Polshanyń «Katovıtse» komandasyn 4:2 esebimen jeńgen bolatyn.
Alaıda, komandanyń jeńisti sátinde Qazaqstan Respýblıkasynyń eski gımni oryndalǵan edi. Buǵan komanda oıynshylary men jankúıerleri narazylyǵyn bildirdi. Keıin uıymdastyrýshylar "Arlandyqtardan" keshirim surady.
