Hokkeı: Álıhan Ásetov «Barystyń» qazan aıyndaǵy úzdik oıynshysy atandy
NUR-SULTAN. QazAqparat – Shabýylshy Álıhan Ásetov «Barystyń» qazan aıyndaǵy úzdik oıynshysy atandy, dep habarlaıdy QazAqparat tilshisi.
«Barys» hokkeı klýby men FONBET býkmekerlik kompanııasy jankúıerler arasyndaǵy daýys berýdiń qorytyndysyn shyǵardy.
Klýbtyń saıtynan alynǵan málimetke qaraǵanda, 23 jastaǵy Á.Ásetov 48 paıyz daýys jınap, ózgelerden qara ozyp ketti. Komanda kapıtany, qorǵaýshy Darren Dıts (12 paıyz) ekinshi, qaqpashy Eddı Paskýale (10 paıyz) úshinshi orynda.
Álıhanǵa estelik syılyqty FONBET býkmekerlik kompanııasynyń ókili Arman Ateev tabys etti.
Á.Ásetovtiń QHL-da ótken jyldan beri óner kórsetip kele jatqany belgili. Qazan aıynda ol «Barystyń» 12 matchynyń 11-inde aıdynǵa shyǵyp, tórt gol soqty, qaqpaǵa 13 soqqy baǵyttady.
Sonymen qatar «Barystyń» taǵy bir shabýylshysy Nıkıta Mıhaılıstiń Máskeýdiń «Dınamo» komandasynyń qaqpasyna soqqan golyn Qurlyqtyq hokkeı lıgasy (QHL) ótken aptadaǵy eń úzdik dep tanydy.
Eske sala keteıik, budan buryn «Barystyń» «Avtomobılıst» komandasynan basym túskenin jazǵan bolatynbyz.
Elordalyqtar QHL-dyń jalpy kestesinde segizinshi, Shyǵys konferentsııasynda tórtinshi orynda keledi.
