Hokkeı: Álem chempıonatynyń fınaldyq kezeńi Belarýste ótpeıdi
NUR-SULTAN. QazAqparat - Halyqaralyq shaıbaly hokkeı federatsııasy 2021 jylǵy álem chempıonatyn ótkizetin eldiń biri Belarýsti tizimnen shyǵaryp tastady, dep habarlaıdy QazAqparat atalǵan uıymnyń saıtyna silteme jasap.
Aıta keteıik, dúbirli doda bıyl Belarýs astanasy - Mınsk, Latvııa astanasy - Rıga qalalarynda 21 mamyr jáne 6 maýsym aralyǵynda ótkizilýi tıis bolatyn. Álemniń kóptegen memleketteri men demeýshiler Belarýstegi saıası jaǵdaıdyń turaqsyz bolýyna baılanysty ony tizimnen alyp tastaý jóninde usynys bildirgen.
Osyǵan oraı halyqaralyq shaıbaly hokkeı federatsııasy naqty sheshim qabyldady. Atalǵan uıym álem chempıonatynyń fınaldyq kezeńi Belarýste ótpeıtinin málimdedi. Endigi kezekte Latvııa dúbirli dodany jalǵyz ótkizý jóninde nıeti jasap otyr.
Esterińizge sala ketelik, top-dıvızıonda bıyl Qazaqstan quramasy da baq synaıdy. Qazaqstandyq hokkeıshiler V tobynda Kanada, Fınlıandııa, AQSh, Germanııa, Norvegııa, Italııa jáne Latvııa quramalarymen sheberlik baıqasady. Al A tobynda Shvetsııa, Chehııa, Shveıtsarııa, Slovakııa, Danııa, Belarýs, Ulybrıtanııa jáne Reseı bar.
