Hokkeı: 2021 jylǵy álem chempıonatynyń ótetin kúni bekitildi
NUR-SULTAN. QazAqparat - Halyqaralyq hokkeı federatsııasy (IIHF) Qazaqstan quramasynyń qatysýymen ótetin 2021 jylǵy álem chempıonatynyń ótetin merzimin bekitti, dep habarlaıdy QazAqparat tilshisi federatsııa saıtyna silteme jasap.
Álem chempıonaty Belarýs astanasy - Mınsk jáne Latvııa astanasy - Rıga qalalarynda ótkiziledi. Dúbirli doda 21 mamyrda bastalyp, 6 maýsymda máresine jetedi.
Aıta keteıik, Qazaqstan quramasy Rıga qalasynda oınaıtyn A tobynda baq synaıdy. Qarsylastary - Kanada, Fınlıandııa, AQSh, Germanııa, Latvııa, Norvegııa jáne Italııa quramalary. Al Mınskide Reseı, Shvetsııa, Chehııa, Shveıtsarııa, Slovakııa, Danııa, Belarýs jáne Ulybrıtanııa quramalary sheberlik baıqasady.
Esterińizge sala ketelik, 2020 jylǵy álem chempıonaty mamyr aıynda Shveıtsarııada ótýi tıis bolatyn. Ol dúnıe júzin jaılaǵan koronavırýs pandemııasy saldarynan ótpeıtin bolyp sheshildi.
Qazaqstan quramasy 2019 jyly álem chempıonaty birinshi dıvızıonynda jeńimpaz atanyp, top-dıvızıonǵa joldama aldy.
Budan buryn Qazaqstan hokkeıden 2026 jylǵy álem chempıonatyn qabyldaýdan úmitker ekeni habarlandy.
