Hokkeı: 2021 jylǵy álem chempıonatynyń kúntizbesin jarııalandy
NUR-SULTAN. QazAqparat - Halyqaralyq hokkeı federatsııasy 2021 jylǵy álem chempıonatynyń kúntizbesin jarııalady, dep habarlaıdy QazAqparat tilshisi.
Esterińizge sala ketelik, dúbirli doda 21 mamyr jáne 6 maýsym aralyǵynda Latvııa astanasy - Rıga qalasynda ótkiziledi.
Kóp jyldyq úzilisten keıin top-dıvızıonǵa qaıta oralǵan Qazaqstan quramasy V tobynda synǵa túsedi. Qarsylastary - Kanada, Fınlıandııa, AQSh, Germanııa, Latvııa, Norvegııa jáne Italııa.
Bul toptaǵy quramalar Arena Riga sport kesheninde sheberlik baıqasady. Ol qurlyqtyq hokkeı lıgasynda baq synap júrgen «Dınamo» (Rıga) komandasynyń negizgi arenasy sanalady.
Toptyq kezeńdegi alǵashqy oıyndy qazaqstandyq hokkeıshiler 22 mamyrda Latvııamen bastaıdy. Odan keıin 23 mamyrda Fınlıandııa, 25 mamyrda AQSh, 26 mamyrda Germanııamen muz aıdynǵa shyǵady. Al 28 jáne 29 mamyr kúnderi qazaqstandyqtarǵa Kanada men Italııa qarsylas atansa, sońǵy kezdesý Norvegııamen 31 mamyrda bolady.
Al A tobynda Shvetsııa, Chehııa, Shveıtsarııa, Slovakııa, Danııa, Belarýs, Ulybrıtanııa jáne Reseı bar.
Aıta ketelik, Qazaqstan quramasyna qazir «Barys» komandasynyń bas bapkeri ıÝrıı Mıhaılıs jetekshilik jasaıdy. Onyń basshylyǵymen qazaqstandyq hokkeıshiler 10 jáne 13 aqpan kúnderi elordada ótetin halyqaralyq týrnırde álem chempıonatyna daıyndyǵyn pysyqtaıdy. Týrnır barysynda Reseı jáne Belarýs quramalarymen sheberlik baıqasady.
Eske sala keteıik, alǵashqyda álem chempıonaty Belarýs jáne Latvııada ótkiziledi dep josparlanǵan bolatyn. Keıinnen Belarýstaǵy saıası ahýaldyń turaqsyzdyǵyna baılanysty bul el mundaı múmkindikten aıyrylyp qaldy.
