Hokkaıdo aralynda magnıtýdasy 6,2 bolatyn jer silkinisi tirkeldi
ASTANA. KAZINFORM — Japonııanyń Hokkaıdo araly aýmaǵynda magnıtýdasy 6,2 bolatyn jer silkinisi boldy. Tsýnamı qaýpi týraly eskertý jarııalanǵan joq, dep habarlaıdy Kazinform agenttigi Kyodo-ǵa silteme jasap.
Japonııanyń meteorologııalyq agenttigi málimetine súıensek, jerasty dúmpýleri 27 sáýir kúni jergilikti ýaqyt boıynsha tańǵy saǵat 05:24-te tirkelgen. Tokatı óńiri aýmaǵynda silkinis qarqyny ulttyq jeti baldyq shkala boıynsha «kúshti 5» deńgeıine jetken. Mundaı jaǵdaıda adamdarǵa tireksiz aıaqta tik turý qıynǵa soǵady.
Jer silkinisiniń oshaǵy shamamen 83 shaqyrym tereńdikte ornalasqan.
Zardap shekkender týraly aqparat túsken joq. Hokkaido Electric Power Co. Tomarı atom elektr stantsııasynyń shtattyq rejimde jumys istep turǵanyn habarlady, eshqandaı aqaý anyqtalmaǵan.
Bul jer silkinisi aımaqta seısmıkalyq belsendiliktiń kúsheıýine baılanysty jarııalanǵan eskertýden keıin boldy. Mundaı eskertý bir apta buryn Aomorı prefektýrasy aýmaǵynda magnıtýdasy 7,7 bolǵan qýatty jer silkinisinen keıin engizilgen. Hokkaıdo joǵary daıyndyq rejimi saqtalǵan jeti óńirdiń qataryna kiredi.
Alǵashynda jer silkinisiniń magnıtýdasy 6,1 dep baǵalanǵan, keıin bul kórsetkish 6,2-ge naqtylandy.
Aıta keteıik, 20 sáýir kúni Japonııada kúshti jer silkinisinen keıin tsýnamı týraly eskertý jarııalandy.
Al Kaspıı teńizinde magnıtýdasy 4,2 bolatyn jer silkinisi tirkeldi.
