HOK World Boxing federatsııasyn ýaqytsha moıyndady

ASTANA. KAZINFORM – Halyqaralyq Olımpıadalyq komıtetiniń (HOK) Atqarýshy keńesi qashyqtan ótken otyrysta World Boxing Halyqaralyq federatsııasyn ýaqytsha moıyndady. Bul týraly UOK jazdy.

Bul uıymǵa álemdik deńgeıde boksty qadaǵalaý quqyǵyn beredi.

HOK bul sheshimdi qabyldaýǵa áser etken negizgi sebepterdi atady:

— Uıym quramynda bes qurlyqtan 78 ulttyq federatsııa bar, sondaı-aq tórt qurlyq konfederatsııasy qurylǵan;

— Parıjdegi 2024 jylǵy Olımpıada oıyndaryna qatysqan boksshylardyń 62%-y jáne júldegerlerdiń 58%-y World Boxing quramyna kiretin federatsııalar atynan óner kórsetti;

— 2024 jylǵy Olımpıadada táýelsiz baqylaý aıasynda qoldanylǵan sporttyń adaldyǵyn qamtamasyz etý protsesi engizildi;

— World Boxing uıymy AIMS músheligin aldy, ony SportAccord Atqarýshy komıteti men AIMS Bas assambleıasy maquldady;

— Basqarý júıesi ázirlenip, oǵan Etıkalyq kodeks, sybaılas jemqorlyqqa qarsy saıasat, múddeler qaqtyǵysy saıasaty jáne qarjy komıtetiniń jumys reglamenti engizildi;

— 2025–2028 jyldarǵa qarjylandyrýdy qamtamasyz etetin uzaq merzimdi kommertsııalyq kelisimder jasaldy;

— Uıym Sporttyq arbıtraj sotynyń (CAS) ıýrısdıktsııasyn moıyndady;

— Dúnıejúzilik dopıngke qarsy agenttigi (WADA) kodeksiniń qatysýshysy mártebesin aldy jáne Halyqaralyq testileý agenttigimen (ITA) kelisimshart tolyq oryndaldy.

HOK-niń baǵalaý qorytyndysy boıynsha, World Boxing basqarý jáne sporttyq damý salasyndaǵy negizgi máselelerde aıtarlyqtaı jetistikke qol jetkizdi. Osyǵan baılanysty uıymdy Olımpıadalyq qozǵalys aıasynda álemdik deńgeıdegi boksty retteıtin Halyqaralyq federatsııa retinde ýaqytsha moıyndaý usynyldy.

Eske sala keteıik, buǵan deıin Jánibek Álimhanuly Qazaqstanda chempıondyq ataǵyn qorǵaıtynyn jazǵan bolatynbyz.