HOK Vasılıı Levıt pen Evgenıı Tışenkonyń kezdesýiniń nátıjelerin zerdeleýde
ASTANA. QazAqparat - Halyqaralyq olımpıada komıteti (HOK) Halyqaralyq boks qaýymdastyǵynyń (AIBA) basshylyǵyna qatysty tergeý sharalaryn bastady. Bul týraly HOK basshysy Tomas Bah málim etti, dep habarlaıdy TASS.
Bul sheshim HOK-tyń atqarýshy komıtetiniń Phenchhanda ótken májilisiniń qorytyndysy boıynsha qabyldanǵan. Habarda HOK-ty AIBA-nyń qarjyny basqarý men dopıngke qarsy baıandamasy qanaǵattandyrmaǵandyǵy aıtylady.
«HOK-tyń atqarýshy komıteti AIBA basshylyǵyndaǵy jaǵdaıǵa alańdaýshylyq bildirip otyr»,-dedi Bah.
«Biz AIBA basshylyǵyna qarasty tergeý bastalǵandyǵyn rastaımyz. Atqarýshy komıtet sonymen qatar HOK sheshimderin júzege asyrýǵa yqpal etetin jumystardan tys máseleler boıynsha da baılanystardy toqtatty».
Sondaı-aq HOK AIBA-ǵa tólenetin tólemderdiń barlyǵyn qysqarty. HOK-tyń atqarýshy komıteti uıym týraly esepti 2018 jyldyń 30 sáýirinde jasalady dep kútip otyr.
Bah baspasóz máslıhatynda Olımpıada oıyndaryndaǵy tóreshiliktiń alańdatyp otyrǵandyǵyn aıtty.
Onyń sózinshe, HOK Rıo-de-Janeıroda 2016 jyly ótken Olımpıada kezinde reseılik boksshylardyń qatysýymen ótken eki kezdesýdiń nátıjelerin zerdeleýdi jalǵastyrýda. Birinshisinde, Evgenıı Tışenko fınalda qazaqstandyq Vasılıı Levıtti (91 kelige deıin salmaq) jeńdi. Ekinshisinde, Vladımır Nıkıtın shırek fınalda ırlandııalyq Maıkl Konlandy (56 kelige deıingi salmaqta) utyp ketti.
«Kezinde biz atalǵan kezdesýlerge qatysty AIBA-dan esep alǵanbyz. Soǵan qaramastan biz qosymsha aqparattardy da surastyryp, bul isti zerdeleýmen áli de aınalysýdamyz»,-dep habarlady HOK basshysy.
AIBA-ny uzaq ýaqyt boıy basqarǵan Chıng-Kýo Vý uıymdaǵy qarjylyq jaǵdaıdyń nasharlap bara jatqandyǵy týraly aıyptaýlardan soń ótken jyldyń sońynda otstavkaǵa shyqty. Onyń ornyn qaýymdastyqtyń jarlyǵy boıynsha, uıymnyń vıtse-prezıdenti Franko Falchınellı basty. Ol az ýaqyttan soń bul laýazymnan bas tartty.
Osyǵan baılanysty Chıng-Kýo Výdyń mindetin atqarýshy qyzmetine Gafýr Rahımov kiristi. Uıym basshylyǵyndaǵy aýys-túıisterden soń HOK ondaǵy jaǵdaıǵa baılanysty jáne Rahımovtyń basshylyqqa kelýine qatysty alańdaýshylyq bildirdi. AIBA prezıdentiniń saılaýy Máskeýde qarashada ótedi.
