HOK-tiń ýaqytsha moıyndaýy bizde sport durys baǵytta damyp jatqanyn kórsetedi – Golovkın
ASTANA. KAZINFORM — 26 aqpanda Halyqaralyq Olımpıadalyq komıteti (HOK) World Boxing halyqaralyq federatsııasyn ýaqytsha moıyndaǵanyn resmı túrde jarııalady.
Bul sheshimge Qazaqstan Ulttyq Olımpıadalyq komıtetiniń prezıdenti, World Boxing Olımpıadalyq komıssııasynyń tóraǵasy Gennadıı Golovkın pikir bildirdi.
HOK-tiń ýaqytsha moıyndaýy – mańyzdy jetistik jáne bizdiń sporttyń durys jolda ekenin kórsetedi. Bul sheshim bizdi basty maqsatymyz – boksty Olımpıada oıyndarynda saqtaý jolynda taǵy bir qadam alǵa jyljytady. Men World Boxing-ti qoldaıtyn barlyq adamdardyń úzdiksiz eńbeginiń arqasynda osyndaı nátıjege qol jetkizgenimizge qýanyshtymyn. Bolashaq sportshylar men bolashaq chempıondar úshin bizdiń ortaq maqsatymyz – adaldyq pen beıtaraptyq qaǵıdattaryna negizdelgen Halyqaralyq federatsııa qurý. Barlyq maqsattarymyzǵa jetý úshin áli de kóp jumys isteýimiz kerek, sondyqtan biz osy jetistigimizben shektelmeımiz, - dedi ol.
Aıta ketelik Halyqaralyq Olımpıadalyq komıtetiniń Atqarýshy keńesi qashyqtan ótken otyrysta World Boxing Halyqaralyq federatsııasyn ýaqytsha moıyndaǵan edi.